دیني عالم عبدالغفار جُبیر د ملي امنیت له بنده ازاد شو
(کابل ټکی کام ۱۳۹۶ لړم ۱)ا دیني عالم او نصرانیت او یهودیت د عقیدې پر خلاف مشهور دیني عالم او مناظره کوونکی عبدالغفار جُبیر د ملي امنیت د شل ورځني بند څخه ازاد شو.
عبدالغفار جُبیر شل ورځې وړاندې په کندهار کې ملي امنیت هغه مهال ونیوه، چې د حج له فریضې کور ته را روان وو.
تراوسه پورې د نوموړي د نیول کېدو د لامل په اړه نه ملي امنیت او نه هم د نوموړي کورنۍ څه ویلي دي.
عبدالغفار جُبیر یوازې د یهودو، عیسویانو او نورو منسوخ شویو عقیدو په اړه لیکنې کولې او نوی نسل یې له دې خبراوه.
داسې راپورونه هم ورکړل شوي وو، چې نوموړی د امریکا په امر نیول شوی دی؛ خو پر حکومت د زیاتو فعالانو د زور له امله یې نوموړی بېرته ازاد کړی دی.
د عبدالغفار جُبیر څو کتابونه هم چاپ شوي او پښتو وېباڼو کې سلګونه لیکنې هم خپرې شوي دي.
