سمنگان کې یو تن خپله خواښې او مېرمن وژلي
(کابل ټکی کام ۱۳۹۶ لړم ۸)د سمنگان ولایت امنیتي چارواکي وايي، تېره شپه یې هغه تن نیولی، چې د خپل خسر پر کور یې برید کړی و او خپله مېرمن یې وژلې وه او خسر او اوښی یې ټپي کړي وو.
د سمنگان د امنیه قومندانۍ د امنیت امر سمونوال خواني طاهري وايي، نیول شوي تن څلور میاشتې مخکې خپله خواښې وژلې وه؛ خو تېره شپه یې د خسر پر کور برید کړی و او خپله مېرمن یې په تبر وژلې وه او دوه تنه نور یې ټپیان کړي وو.
د خواني په خبره، د دواړو وژونکی یې نیولی او پولیسو ته یې په خپل جرم اعتراف هم کړی دی.
د کورني تاوتریخوالي له امله دغه ډول پېښې ورځ تر بلې ډېریږي.
تېره ورځ د فاریاب امنیتي چارواکو ویلي وو، چې په دې ولایت کې یوې ځوانۍ نجلۍ ځانوژنه کړې ده.
