(کابل ټکی کام ۱۳۹۶ لړم ۱۷ فرید افغان)
تیره ورځ ماښام مهال د میدان وردګ ولایت د سید آباد ولسوالۍاړوند په ټوپ دښته کې د افغان عسکرو پر یوه روزنیرز کمپ ډلییز وسلوال برید ترسره شو.
برید په یوې خورا زورورې چاودنې سره پیل شو چې شاوخوا ۲ ساعته یې دوام وکړ.
د سیمې خلک وایي چې چاودنه دومره زوروره وه چې غږ یې څو کیلو متره لرې واوریدل شو.
د برید دتلفاتو په هکله ادعاوې مختلفې دي .
د میدان وردګو والي ځونډي ګل زماني رسنیو ته ویلي چې په یاد ډلییز برید کې یواځې بریدګرو ته مرګ ژوبله اوښتې او د دوی ځواکونه کوم تلفات نلري.
خو طالب ویاند ذبیح الله مجاهد بیا د نوموړي ادعا په بشپړ ډول ردوي او زیاتوي چې؛ په برید کې یې لسګونو افغان عسکرو او د هغوی بهرنیو روزونکو ته مرګ ژوبله اړولې.
نوموړي په یوه خبرپاڼه کې ویلي چې؛ په یاد برید کې یې له ۲ موټر بمونو څخه کار اخیستی، چې لمړی هغه یې په نظام قراول یا هم ورودي دروازه کې چاودنه ترسره کړې او له موانعو وروسته یې بل موټر د مرکز داخل ته ځان رسولی او هلته یې له انفجار سره ګڼو عسکرو او روزونکو ته مرګه ژوبله اړولې.
د مجاهد په خبره؛ تر دواړو چاودنو وروسته ۸ تنه په سپکو او درنو وسلو سنبال طالبان مرکز ته ننوتل او له دوه ساعتیزې تصفیې وروسته په خوندي ډول له مرکز څخه بیرته ووتل او خپلو ځایونو ته یې ځانونه ورسول.
ویل کیږي چې په یاده اکاډمۍ کې تر ۲۰۰۰ پولیس او ۲۵۰ استادان میشت ول.
طالبانو ویلي چې برید یې هغه مهال ترسره کړی چې پولیس طعام خونې ته را یوځای شوي و.
د سیمې خلک وایي؛ چې د دو چاودنو وروسته یې څو ساعتیزه جګړه تر سره شوې ده.
د دوی په وینا چې سیمې ته لسګونه امبولاسونه رسیدلي خو د تلفاتو له شمیرې خبر نه لري.
