(کابل ټکی کام ۱۳۹۶ لړم ۱۸ فرید افغان)
د حزب اسلامي مشر ګلبدین حکمتیار تیره ورځ د لویې جرګې په خیمه کې خپلو پلویانو ته اوږده وینا وکړه چې زیات تمرکز یې په انتخاباتو و.
نوموړي څرګنده کړه، چې د هېواد شمال او نورو سیمو کې اوسنۍ جګړه د دولت او مخالفانو ترمنځ نه بلکې د دوو قومو ترمنځ ده.
حکمتیار چې د واک پر سر شخړو کې د نورو جهادي رهبرانو سره په تنظیمي شخړو کې لسګونه زره بیګناه هیوادوال د مرګي له تیغه تیر کړي دي اوس د طالبانو او د امریکایانو په مشرۍ افغان ځواکونو تر منځ جګړې ته هم قومي رنګ ورکوي او په وینا یې چې دا جګړه هم دوه قومي مخالفین ترسره کوي.
د حکمتیار په خبره؛ ځینې ډلې د خپل پایښت لپاره جګړه کوي او ځینې یې هم افغان امنیتي ځواکونه او د هغوی تجهیزات د خپلو قومي او سیاسي سیالانو پر ضد کاروي چې باید حکومت یې مخه ونیسي.
نوموړي د زرګونو خلکو را ټولیدل هغه قربانۍ بللې ، چې په خبره یې ؛ نوموړي د جهاد په لارې کې ورکړي دي.
نوموړي وویل چې په انتخاباتو کې به مخکښ کاندیدان هغه وي چې حزب ورڅخه ملاتړ وکړي.
نوموړي ونه ویل چې حزب له خپله ادرسه ولې کاندید نه دروي.
ګلبدین زیاته کړه چې د راتلونکو انتخاباتو د شفافیت لپاره اړینه ده چې په هر ولايت کې حوزې جوړې شي او له دغو حوزو دې د سيمې خلک د وکیلانو یوه لیست ته رایه ورکوي چې هغه لیست به تر خپل ځانګړي ګوند پورې تړاو لري.
که څه هم د حکمتیار په مشرۍ حزب اسلامي لا هم په عدلیې وزارت کې رسمیت نلري او په دې نوم د ارغندیوال ډله درج شوې ده، خو نوموړي هغه ګنګوسې رد کړې چې ګواکې د حزب اسلامي د ګوند د غړو تر منځ اختلاف زیات شوی او په وینا یې چې دوی ټول یو ګوند دی او واحد دریځ لري هغه څه چې د ارغندیوال ډلې په وار وار رد کړی دی.
ګلبدین هغو کړیو ته په اشارې سره چې په ګډحکومت نیوکې کوي وویل؛ ځینې کسان شته چې د بن کنفرانس په څېر له جوړې شوې غونډې خپله ونډه تر لاسه کړي .
حکمتیار ټینګار وکړ؛ چې دوی په حکومت کې بدلون د انتخاباتو له لارې غواړي .
نوموړي په ټوله وینا کې له انتخاباتو پرته بله کومه موضوع مطرح نه کړه .
نوموړي د امریکایانو پر وروستیو بمباریو چې د هیواد په زیاترو برخو، په ځانګړي ډول د ده په اصلي ټاټوبي ‹‹کندوز›› کې یې لسګونه ولسي وګړي ووژل هیڅ کومه څرګندونه ونکړه.
