خپور شوی لیست سپیناوي ته اړتیا نه لري!/ اباسین رودوال

تېره اوونۍ د ننګرهار د ملي امنیت رییس د ګمرک رییس ته زنګ وهلی او ورته یې ویلي، چې ته په ننګرهار او کابل کې د زیاتو چارواکو برخه کوې، ماته ولې برخه نه راکوې؟
د ګمرک رییس ورته ویلي، چې سبا به کس پیسې دروړي. کله چې د ګمرک کمېشن‌کار د امنیت رییس ته سره د لیسته ورغلی؛ نو هغه هم نیولی دی.
په فېسبوک کې د ننګرهار فعالانو دغه موضوع ډېره ګرمه کړې وه او د دوه سري حکومت له مشرانو یې غوښتل، چې باید ننګرهار کې شته مافیا ختمه کړي او د ګمرک د رییس په ګډون ښکېل کسان باید ونیول او څارنوالۍ ته ورپېژندل شي؛ خو دلته یوازې نظرمحمد مطمئن او حسن حقیار نیول کېږي او غله، داړه ماران او زورواکي دې ارتې تڼۍ ګرځي.
نن دغه لېست سرخط ورځپاڼې خپور کړ او فېسبوک کې بیا غوغا پورته شوه. ځینې یې جعلي او ځینې یې رښتینی ګڼي؛ خو لانجه د کابل پوهنتون استاد لال پاچا ازمون او د ننګرهار پوهنتون رییس ببرک میاخېل پرسر شخړه لا پاتې ده.
لال پاچا ازمون د کابل پوهنتون استاد، د ننګرهار پوهنتون د پښتو ادبیاتو د ماسټرۍ استاد، د ختیزې سیمې د لیکوالو او ژورنالېستانو د ټولنې مشر، د اشرف غني مشاور او نورې لسګونه پټې او ښکاره دندې لري؛ خو همدغه استاد په ننګرهار کې څلور پاخه کورونه لري، چې اوس یې دوه په بیه کې اچولي او د هر یوه قیمت یې درې سوه زره ډالر ايښی دی. د ریګ شامرد خان کور، د جوی هفت د رییس اباد کور، د زیړانیو کور او خپل شخصي کور یې. دا خو یې ښکاره دي؛ خدای خبر پټ به یې څومره ساتلي وي؟
ازمون د ننګرهار د مخکېني والي ګلاغا شېرزي فرهنګي مشاور و او په ننګرهار کې د یوې فرهنګي عادي غونډې لپاره يې هم د شېرزي نه لکونه افغانۍ او ډالر شکول او په خپل جېب کې یې منډل.
ببرک میاخېل د ننګرهار پوهنتون د ادبیاتو استاد او اوس د غني په کاواکه نظام کې د دې پوهنتون رییس شو. کنه له ده په ننګرهار کې ډېر وړ خلک شته، چې د پوهنتون رییس شوی وای. میاخېل د پوهنتون نیمه سرمایه په خپل شخصي کور لګولې او تراوسه یې هم ورته پښې اړم کړي دي.
دا چې دا دواړه ښاغلي استادان او ځان پر هېواد او ولس میئن شخصیتونه ګڼي؛ خو د ګمرک له رییس نه زرګونه ډالر معاش اخلي؛ ځکه د زیاتو خلکو خوا ترې بده شوې ده.
که قانون تطبقېږي، باید د ننګرهار له والي نیولې تر ازمونه پورې ټول باید محکمې مېز ته راکش کړل او د کړیو درغلیو پوښتنه ترې وشي؛ ګنې قانون به یوازې د قانون د کتاب څو ټکي پاتې شي.