(کابل ټکی کام ۱۳۹۶ لړم ۱۸ فرید افغان)
دفاع وزارت وایي چې د نوي قانون تر مخه هغه افسران تقاعد ته اړ ایستل کیږي چې عمرونه یې لوړ وي.
د نوي قانون تر مخه د پوځي جنګیالیو د تقاعد لپاره ټاکل شوي کلونه ۳ کاله را ټیټ شوي دي او هغه جنرالان چې درۍ کاله وروسته یې تقاعد اخیسته راتلونکی کال به خپلې دندې پریږدي.
د دفاع وزارت ویاند دولت وزیري په وینا؛ پدې لړۍ کې به ۷۰ سلنه جنرالان تقاعد شي چې له ډلې به یې ۳۰% ځوان جنرالان پر خپله دنده پاتې شي .
د وزیري د معلوماتو تر مخه؛ په دغه قانون کې د سترجنرال لپاره ۶۲، ډګر جنرال لپاره ۶۰، تورن جنرال لپاره ۵۸، برید جنرال لپاره ۵۶ او ډګروالانو لپاره ۵۴ کاله د تقاعد عمر ټاکل شوی دی.
د وزیري په خبره؛ د افسرانو د تقاعد پروسه په اتلسو میاشتو کې تطبیق کیږي.
دفاع وزارت وایي چې دا پروسه ۳ پړاونه لري چې لومړی هغه به یې د روان کال په جدي کې پیل او د ۱۳۹۷ په اسد میاشت کې به بشپړه کیږي، چې په دې پړاو کې به هغه جنرالان پر کور کینول(تقاعد) کیږي چې ، په احتیاط کې دي او یایې هم بستونه ټیټ دي.
د نوموړي په وینا؛ دوهم پړاو به، د ۱۳۹۷ کال له اسد څخه پیلیږي او د همدې کال تر جدي به دوام کوي چې په دې لړ کې به هغه افسران تقاعد ته سوق کیږي، چې عمرونه یې زیات دي .
وزیري زیاتوي چې د دې بهیر وروستی پړاو به د ۱۳۹۷ کال له جدي څخه پيل او د ۱۳۹۸ کال تر اسد پورې دوام وکړي، چې په دې لړ کې به د یاد قانون ترمخه ټول افسران چې ټاکلي عمر ته رسیدلي له دندې ګوښه کړای شي.
د چارو ځینې څارونکي وایي چې داطرحه د امریکایانو له لوري د هغو جنرالانو د ریښې ایستلو لپاره تطبیق کیږي چې هغوی په روسیه کې زدکړې کړې او ځای به یې هغه جنرالان ډک کړي چې د امریکا او ناټو ځواکونو لخوا روزل شوي دي.
که څه هم دفاع وزارت ټینګار کوي چې دا پروسه به پر پوځ کومه منفي اغیزه ونکړي. خو د شنونکو په آند ښایي دا قانون ډیرې ناوړه پایلې ولري چې د پوځ کمزورتیا، د داخلي اختلافاتو پنځیدل او یو لړ نورې نیمګړتیاوې ښایي رامنځته کړي.
