(کابل ټکی کام ۱۳۹۶لړم ۲۰): طالبانو به خپله رسمي ويبپاڼه الاماره کې ويلي، چې د روان ميلادي کال په تېره اکتوبر مياشت کې د کابل ادارې له بېلابېلو ادارو څخه ۲۹۷ کارکوونکي رابيل او دوی سره يوځای شوي دي.
طالبان وايي، دغه کسان د (دعوت وارشاد او جلب وجذب کميسيون) په هڅو دې ته تيار شول چې د دولت څخه رابيل او د طالبانو ليکو ته ورشي.
په خبرپاڼه کې راغلي، چې دغو کسانو بېلابېل ډوله غټې او وړې وسلې، مخابرې، پوځي توکي او په زياته اندازه مهمات هم طالبانو ته سپارلي دي.
طالبان وايي، د کابل ادارې څخه رابيل شويو کسانو ورسره وعده کړې، چې له دې وروسته به په دولت کې هيڅ ډول دنده نه کوي او له هغوی سره به هيڅ ډول اړيکي نه ساتي، بالمقابل طالبانو سره يې د مرستې او همکارۍ ژمنه کړې ده.
طالبان د دولت څخه د بېلېدونکو او هغوی ته د تسليمېدونکو کسانو لپاره د دعوت ارشاد او جلب جذب په نوم ځانګړی کميسيون جوړ کړی، چې وخت ناوخت ورته د کابل ادارې کارمندان او نظامي کسان تسليمېږي.
د طالبانو په دغه خبرپاڼه کې راغلي، چې د دولت څخه دغو رابيلو شويو کسانو ته د ياد کمسيون د مشرتابه له لوري انعامونه او جايزې ورکړل شوې، هغوی ته هرکلی ويل شوی او دغه چاره يې ستايل شوې ده.
طالبان کله ناکله له خپلو رسمي ادرسونو څخه دغه ډول مستند راپورونه خپروي، چې د ملي اردو عسکر، پوليس، اربکيان او نور دولتي منسوبين طالبانو ته تسليميږي، چې دا په خپله د افغان ځواکونو د کمزورۍ او په جګړه کې د سرتېرو ناوړه حالت او ټيټ مورال په ډاګه کوي.
