طالبان کندهار کې وسلې او مهمات له کومه پيدا کوي؟
(کابل ټکی کام، ۱۳۹۶، ليندۍ ۴): طالبانو د کندهار ولايت په ټولو ولسواليو کې د خپلو بريدونو يوولس مياشتنی راپور نشر کړ، چې په وينا يې په تېرو يوولس مياشتو کې يې په بهرنيو او دولتي ځواکونو ۵۰۴ بريدونه کړي دي.
د طالبانو وياند قاري يوسف احمدي په خپله ټويټر پاڼه ليکلي، د دغو بريدونو په پايله کې يواځې په کندهار کې ۴۵ بهرني او ۱۵۵۷ دولتي عسکر وژل شوي، ۲۹۳ نور ټپيان دي.
د هغه په وينا، په دې موده کې طالبانو د دوو ولسواليو تر څنګ يو کنډک ۹ قرارګاوې او ۱۰۴ پوستې نيولي دي.
ښاغلي احمدي د لسګونو عسکرو د نيول کېدو او له سلو زياتو د تسليمېدو خبره کوي، زياتوي : “له تېرو يوولس مياشتو د بريدونو او په دولتي ځواکونو د فشار له کبله ۱۷۰ تنه تسليم شوي او ۹۵ نور نيول شوي دي ”
طالبان وايي، په دغه موده کې يې د دولتي ځواکونو ۳۴۶ بېلابېل ډوله موټر، ټانګونه او رينجر له منځه وړي، زياتوي چې د يو سکواټر سربيره ۲۷ رينجر، ۵ لوکسل او ۳۳ موټرسيکلې د دوی لاسته ورغلي دي.
طالبانو ويلي، په دغو بريدونو کې يې په سلګونو غټې مرمۍ او په لکونو د وړې وسلې د مرميو د نيولو تر څنګ له شلو زيات د شپې او د ورځې دوربينونه او له ديرشو زياتې وړې او لويې مخابرې هم نيولي دي.
تر دې وړاندې داسې راپورونه ورکول کېدل چې طالبانو سره روسيه او ځينې نور هېوادونه د وسلو د ورکړې مرسته کوي.
يواځې دا نه، چې په کندهار کې د سلګونه ميله سپکې او درنې وسلې، مهماتو او نورو نظامي توکو د نيولو راپور ورکول کېږي، بلکې هره ورځ طالبان له دلوتي ځواکونو پوځي مرکزونه او پوستې نيسي، چې په ترڅ کې يې زياتې وسلې په لاس ورځي او د هغې په مټ له دولتي عسکرو سره خپله جګړه پر مخ وړي.
خو که د طالبانو له لوري له دولتي ځواکونو د وسلو او نورو نظامي توکو او مهماتو نيولو ته وکتل شي، نو جوته ده چې طالبان وسلې او مهمات له کومه پيدا کوي؟.
