حکمتیار: حکومتي جوړښتونه تر ډیره د قوم پالنې په اساس رامنځته شوي
(کابل ټکی کام ۱۳۹۶ لیندۍ ۱۹ فریدافغان)
د حزب اسلامي مشر ګلبدین حکمتیار نن په خوست ولایت کې خپلو سلګونو راټولو شویو مینوالو ته په بیلابیلو موضوعاتو خپله وینا وکړه.
د نوموړي وینا تر ډیره په حکومتي جوړښتونو او په راتلونکو ټاکنو ورټوله وه.
نوموړي چې په تیر کې د افغانستان روانې ترینګلتیا ته د قومي جګړې نوم ورکړی و یوځل بیا وویل، یو شمیر سیاسي ګوندونه په قوم پالنه او تعصب راپورته شوي او غواړي د خپل قوم نفوذ په حکومت کې ډیر کړي.
نوموړي له ګډحکومت ګیله وکړه چې د لویې پکتیا خلکو ته یې په حکومت کې لږ ونډه ورکړې او په وینا یې چې اقلاً د لویې پکتیا ونډه باید له بامیانو، دایکندي او پنجشیر څخه لوړه وای.
د حزب اسلامي مشر همداراز د ځدراڼو له قوم څخه په دفاع کې وویل چې څو ولسوالۍ لري خو په حکومت کې ځانګړی سهم نه لري دنوموړي په خبره د دې لامل ښایي دا وي چې مولوي صاحب جلالدین حقاني د دې ټبر څخه و او هغه د امریکایانو پر وړاندې جګړې کړې دي.
نوموړي همداراز دراتلونکو ټاکنو په شفافیت ټینګار وکړ او زیاته یې کړه چې حکومت ښایي دا ټاکنې د تیر په څیر یوځل بیا وځنډوي.
حکمتیار له انتخاباتي کمیسیونونو وغوښتل چې پر وخت شفافې او عادلانه ټاکنې ترسره کړي.
ګلبدین حکمتیار د ایران هیواد تورن کړ چې په سیمه کې ناخوالو ته لمن وهي او په خبره یې چې پهمنځني ختیځ کې د روانو سیاسي کړکیچونو اصلي لامل د ایران هیواد دی.
نوموړي وویل چې ځینې کړۍ د حکومت د پرزولو پلان لري او ټینګار یې وکړ چې هیچاته به هم اجازه ورنه کړي چې د ګډحکومت پرخلاف ګام اوچت کړي.
حکمتیار داسې مهال خوست ته سفر کوي چې تازه له ترکیې څخه هیواد ته ستون شوی و.
د رسنیو د راپورونو تر مخه حکمتیار ته د اردوغان د لیدلو اجازه ور نه کړل شوه او سعودي ورته ویزه ورنه کړه نو له همدې امله یې سفر نیمګړی پای ته ورساوو.
