جمعيت ګوند: انجينير داوود ته د بلخ د والي په توګه د کار کولو اجازه نه ورکوو
(کابل ټکی کام، ۱۳۹۶، لیندۍ ۳۰) د جمعيت اسلامي ګوند يو ځل بيا ټينګار کړی، که ولسمشر د بلخ د ولايت په اړه په وروستۍ پرېکړې غور ونه کړي، دوی به د ولسمشر له لوري ټاکل شوي والي ته اجازه ونه کړي چې په بلخ کې د والي په توګه خپله دنده پيل کړي.
د جمعيت ګوند د وياند مرستيال ذبيح فطرت وايي، د دغه ولايت څخه د ليرې کېدو لپاره يې ولسمشر ته څو شرطونه وړاندې کړي دي، چې پکې د دغه ولايت لپاره د راتلونکي والي انتخابول، د څو وزارتونو، سفارتونو او ولايتونو د مسئوليت سپارل دي.
نوموړی وايي، دغه ژمنې له جمعيت اسلامي ګوند سره د مذاکراتو پر مهال شوې وې.
که څه هم تېره ورځ د بلخ ولايت لپاره د ارګ له لوري نوي ټاکل شوي والي رسنيو سره په يوه مرکه کې وويل، چې د بلخ د والي په توګه د هغه د ټاکنې په اړه د جمعيت ګوند غړي، اجراييه رئيس او د دغه ګوند مشر صلاح الدين رباني مخالفت نه لري، چې هرکله ورته د حکومت له لوري امر وشي دی به په رسمي توګه خپله دنده پيل کړي.
خو د جمعيت ګوند د وياند مرستيال فطرت وايي، ښايي انجينير داوود پخوانی د جمعيت ګوند غړی پاتې شوی وي او د دغه ګوند په وروستيو فعاليتونو او سياسي پرېکړو کې يې کومه مهمه ونډه نه درلوده.
د ارګ ماڼۍ د تېرې دوشنبې په ورځ وويل، چې ولسمشر د بلخ د والي عطامحمد نور استعفی منلې او پر ځای يې انجينير داوود په دنده ګمارل شوی، خو عطانور د ولسشمر د پريکړې سره مخالفت وکړ او ويې ويل چې دغه استعفی يې څو مياشتې مخکې د يو تړون له مخې ولسمشر ته وړاندې کړې وه، چې تړون ونه شو استعفی هم نه ده شوې.
