د چیچنیا ولسمشر:د امریکا په مشرۍ اشغالګر هیوادونه دې د افغانستان په وضعیت وشرمیږي
(کابل ټکی کام ۱۳۹۶ سلواغه ۲ فرید افغان)
د چیچنیا ولسمشر رمضان قدیروف په کابل کې د وروستي برید په تړاو غبرګون ښوودلی او د افغانستان د کړکیچن وضعیت پړه یې پر امریکا غورځولې.
قدیروف ویلي؛ پر افغانستان باندې د امریکایي اشغال له کبله جنګ لا خونړۍ بڼه خپله کړې، میلیونونه کسان ووژل شول او لا هم وژل کیږي خو د جګړو د زیاتوالي اصلي مسؤل لوری( امریکا )په دې اړوند هیڅ توجه نه کوي.
نوموړي ویلي؛ په امریکا کې میشت د بشر حقوقو په نامه ادارې او لویدیځ هیوادونه دې د افغانستان په روان حالت وشرمیږي.
قدیروف زیاته کړه؛ د لسیزو را په دې خوا چې په افغانستان جنګونه او ویرونه روان دي، دا د غربیانو مصنوعي کړنې دي ترڅو اسلامي نړۍ په ګونډو کړي.
د نوموړي په خبره؛ تر هغو چې د امریکا په مشرۍ نړیواله ټولنه په دې هیواد کې اشغالګرانه رول لري تر هغو به یې پر وړاندې مقاومتونه روان وي.
د قدیروف په وینا؛ امریکا د سولې په نامه تبلیغاتي ابزار څخه استفاده کوي او د امریکا په ۱۶ کلن حضور کې د سولې، ترقي او اقتصادي پیاوړتیا هیڅ اثر نه لیدل کیږي.
نوموړي وروسته تر هغه داغبرګون ښوودلی چې تیره ورځ طالبانو د انتر کانټیننیټل پر هوټل ۱۴ ساعتیزه خونړی برید وکړ چې پکې د ۴ افغانانو په ګډون لسګونو بهرني اتباعو ته مرګ ژوبله واوښته.
د رسنیو د راپورونو په استناد؛ بریدګرو یواځې بهرنیان په نښه کول او له افغانانو سره یې کا نه درلود.
آلمانۍ شپیګل مجلې لیکلي چې د بریدګرو هدف امریکایي سفیر جان باس و، چې له برید څخه څو شیبې وړاندې وتلی وو.
