په فراه او فاریاب کې دوه جنایي او یوه امنیتي پیښه رامنځته شوې دي
(کابل ټکی کام ۱۳۹۶ سلواغه ۴ فرید افغان)
د فراه د ولایتي شورا غړې جمیلې امیني رسنیو ته ویلي چې د دې ولایت پولیسو د سپرلۍ موټر یو ډریور په مخامخ ډزو کې وژلی دی.
نوموړې زیاتوي پولیسو نوموړي ته د دریدو امر کړی خو موټروان خپل موټر نه دی درولی چې په نتیجه کې یې نوموړی د پولیسو له غبرګون سره مخ او وژل شوی دی.
پیښه دفراه د فراه رود ولسوالۍ په چکاب سیمه کې رامنځته شوې او ځایي خلک وایي چې عسکرو موټروان دپیسو دنه ورکولو له کبله په ډزو شهید کړی دی.
طالبانو دا پیښه یو جنایت بللی دی.
د یو بل خبر تر مخه؛ د فاریاب ولایت د امنیې قوماندانۍ ویاند کریم یورش ادعا کړې چې د دې ولایت په مربوطاتو کې محلي پولیسو (اربکیانو) پر یوې ۱۸ کلنې نجلۍ ډلییز جنسي تیری کړی او له څو ورځو وروسته یې په میمنه ښار کې خوشې کړې ده.
د دې ولایت د ولایتي شورا غړې فریبا توراني دا پیښه نه بښوونکی جنایت بللی او له ځایی ادارو یې د عاملینو دمجازات غوښتنه کړې.
دا په داسې حال کې ده چې تیره ورځ سیګار یو ځل بیا په افغان امنیتي ادارو کې د قتل، اختطاف، جنسي ځورونو او ورته جنایي پیښو له زیاتوالي اندیښنه ښودلې وه.
بل پلو د فراه ولایت چارواکي د پشتکوه ولسوالۍ د امنیت د آمر له وژلو خبر ورکوي.
د دې ولایت د ولایتي شورا غړې شهلا ابوبکر رسنیو ته ویلي چې د پشتکوه ولسوالۍ د ملي امنیت مدیر د فراه ښار ته پر لاره وو، چې د طالبانو له کمین سره مخ او له خپلو ساتونکو سره یوځای ووژل شو.
د فراه د والي مرستیال محمد یونس رسولي پیښه تائیدوي او زیاتوی چې نوموړی د یوه ناڅاپي کمین ښکار شوی دی.
طالبانو د پیښې مسؤلیت منلی دی.
په دې وروستیو کې د فراه ښار امنیت وضعیت تر بل هروخت زیات خراب شوی دی او چارواکي وایي چې ولایت یې د سقوط شیبې شمیري.
