ولسمشر غني له امریکایي جنرال جوزف ووټل څخه د همکایو د زیاتوالي غوشتنه وکړه
(کابل ټکی کام ۱۳۹۶ سلواغه ۸ فرید افغان)
په داسې حال کې چې د امریکا په مشرۍ د افغان امنیتي ځواکونو او طالبانو تر منځ جګړه خونړي پړاو ته داخله شوې او ورځ تر بلې وضعیت کړکیچن کیږي ، په همدې حال کې یو لوړپوړي امریکایي جنرال د سیمې د اوضاع د معلومولو په خاطر افغانستان ته تللی دی .
د امریکا د پوځ د مرکزي قومندانۍ قومندان جنرال جوزف ووټل نن له جمهور رئیس غني سره د بیلابیلو مسائلو په اړوند خبرې وکړې او له افغان حکومت سره یې د نظامي مرستو د لا زیاتوالي ډاډ ورکړ.
غني له امریکایي جنرال څخه مننه وکړه چې د افغانستان سره په امنیتي برخه کې لویه مرسته کوي او زیاته یې کړه چې؛ موږ د هغو زړورو امریکایانو د قربانیو پوروړي یو چې د افغان ځواکونو قومنده او لارښوونه کې له هیڅ خطر څخه دریغ نه کوي.
غني وویل؛ د بلک هاک چورلکو چې تر اوسه یې تر ۱۰ کمې افغانستان ته رسیدلې د مخالفینو په ځپلو کې ښه نتیجه ورکړې ده او له امریکا هیله لري چې د افغان حکومت د لا ثبات په خاطر ورسره همکاري زیاتې کړي.
ووټل ژمنه وکړه چې د افغان ځواکونو د تجهیز او اکمالاتو د پوره کولو په خاطر اوږدمهاله مرسته کوي.
ووټل داسې مهال افغانستان ته سفر کوي چې دا هیواد له سختې سیاسي او امنیتي بې ثباتۍ سره مخ دی او د شنونکو په باور چې د افغانستان د بدبختیو اصلي لامل هم امریکا ده چې په خپل دایمي حضور سره غواړي په سیمه کې نا امنیو ته لمن ووهي
