افغان ولس ټول طالب طالب دی
تبصره
څه موده وړاندې چې په کابل او ولایاتو کې، په تېره بیا، پر انټرکانټیننټل هوټل باندې مرګونی برید وشو، د حکومت په داخل کې له یو شمېر چارواکو سره اندېښنه راپیدا شوه چې نور نو حکومت د طالب په وړاندې ځواب نه شي ویلای؛ ځکه د انټرکانټیننټل هوټل په څېر حساس ځای ته د طالب وسله والو رسېدل او بیا هوټل ته دننه له امنیتي ځواکونوسره د ۱۷ ساعته جګړې جنګي وسایل له ځان سره وړل دا مانا لري چې له بهره تر هوټله په لارو کې د پوستو امنیتي ساتونکي، هوټل ته د داخلېدو په لاره کې د سختو تالاشیو پولیس، له پولیسو سره د تالاشیو پرمختللې آلې، د هوټل په څلورو خواوو کې نصب شوې پټې څارونکې کامرې، دا ټول امنیتي پولیس او وسایل طالبان وو.
د دفاع وزارت د همدې اندېښنې په لرلو سره پرېکړه وکړه چې د جګړې په دوران کې پر امنیتي پولیسو او ملي اردو د طالب وسله والو بریا، له طالب وسله والو سره د ولسي وګړو د مرستې ثبوت دی؛ له همدې امله، له طالب وسله والو سره د پرېکنده مقابلې تر څنګ باید د طالبانو مرسته کوونکي هم ونیول شي.
د لوګر په ولایت کې له امنیتي پولیسو سره د طالب وسله والو مقابلې او بریا ملي امنیت دې ته اړ کړ چې د دفاع وزارت پرېکړه عملي کړي. ملي امنیت د لوګر په ولایت کې سل ولسي وګړي له طالب وسله والو سره د ملاتړ په شک ونیول.
که د ملي امنیت لخوا د شک پر بنسټ د ولسي وګړو نیول دوام وکړي او یا د اشرف غني په غوښتنه د هېواد ځوانان د پولیسو په لیکو کې داخل کړل شي، بیا خو ټول ولس باید ونیول شي. ځکه ټول ولس د طالب وسله والو ملاتړی دی. که ملی امنیت یې نیسي، بیا خو ټول ولس طالب طالب او د نیولو وړ دی.
که د اشرف غني غوښتنه ومنل شي، چې ځوانان دې د پولیسو لیکو کې داخل شي، بیا هم د طالبانو د جهاد صفونه پیاوړي کېږي. ځکه د هېواد په بېلابېلو ولایاتو کې د پوستو په داخل کې پر نورو امنیتي پولیسو د ټوپکو شپیلۍ وراړول هم دا مانا لري چې، که ټول نه وي، تر نیمایي زیات یې د طالبانو نفوذي پولیس او ملاتړي دي. د تېر کال په دوران کې دا ډول په لسګونو پیښې رامنځته شوې او پولیس د خپلو ملګرو له وژلو وروسته طالبانو سره یوځای شوي.
ملي امنیت که په هر ولایت او هره ولسوالۍ کې له طالبانو سره د همکارۍ د شک پر بنسټ ولسي وګړي نیسي، تر زرګونو به یې شمېر واوړي.
که ملي امنیت په څو ولایاتو کې د طالب وسله والو سره د جګړې پر مهال د هغوي ملاتړي د شک پر بنسټ ونیول، شک به یې په حقیقت بدل شي. د هېواد اویا سلنه خاوره په لاس کې لرل خپله دا ثابتوي چې ټول ولس طالب طالب دی او په هر حالت کې له طالب سره مرسته کوي.
په هېواد د طالب نظام ولس لیدلی دی چې هیڅ وخت به بیا د طالبانو د نظام بدیل رانشي او نه به د طالبانو د نظام په څېر امن بیا ولیدل شي. طالبانو د ټانګ او بمبار په زور پر چا حکومت نه دی کړی، بلکې د خپلو مشرانو د اوامرو په منلو یې حکومت کاوه.
کاش چې د چارواکو زامن د اشرف غني په غوښتنه د پولیسو په لیکو کې شامل شي او ملي امنیت په ولس کې د شک پر بنسټ نیولو ته دوام ورکړي؛ بیا به ورته ثابته شي چې پولیس او ټول ولس طالب طالب دی.
