ننګرها: ګډو ځواکونو په يوې ديني مدرسې عمليات کړي
(کابل ټکی کام، ۱۳۹۶، سلواغې ۱۷) د ننګرهار ولايت د شيرزادو ولسوالۍ مربوط د شنډي توت په سيمه کې ګډو ځواکونو په يوې مدرسې عمليات کړي، چې زياته برخه يې نړولې او د مدرسې زده کوونکي يې وهلي دي.
د يادې سیمې يوه اوسېدونکي محمد عمران کابل ټکی کام ته وويل، تېره شپه افغان او امريکايي ځواکونو د شيخ محمدعالم سيمه ييز ديني عالم په مدرسه عمليات وکړل، په ترڅ کې يې د مدرسې دروازې په بمونو نړولي، د مسجد د ټولو ښيښو- الماريو په ګډون ځينې کتابونه او قران مجيدونه هم په مرميو ويشتل شوي دي.
نوموړی وايي، د عملياتو پر مهال د مدرسې زده کوونکي د عسکرو له لوري وهل شوي او تن سخت ټپي شوی دی.
دا لومړی ځل نه دی، چې د ګډو ځواکونو له لوري په مدرسو چاپه اچول کېږي بلکې تر دې مخکې هم د خوږياڼيو ولسوالۍ مربوط د ټټنګ په سيمه کې په يوه مدرسه عمليات او بمبارۍ وکړې، چې د څو تنو ديني زده کوونکو د وژل کېدو سربېره پکې د مدرسې زياته برخه ويجاړه شوه.
د يادونې ده، چې څه موده مخکې د ميدان وردګ ولايت په نرخ ولسوالۍ کې هم د ګډو ځواکونو له لوري په يوه ديني مدرسه عمليات شوي و، چې پکې لسګونه ديني زده کوونکو ته مرګ ژوبله اوښتې وه.
د ټرمپ د نوې ستراتيژۍ له اعلان وروسته، ګډو ځواکونو شپنيو چاپو کې زياتوالی راوستی چې تر ډېره پکې مدرسې، د عامو خلکو ميشت ځايونه، او ګڼ ميشتي اطرافي بازارونه په نښه کېږي او زياته مرګ ژوبله يې هم ملکيانو ته رسېږي.
