خوست کې د کمپاين ځواکونو د يوې کورنۍ اووه کسان شهیدان کړي
کابل.کام، ۱۳۹۶، سلواغه ۱۹ – تېره شپه د خوست ولايت په علي شېرو ولسوالۍ کې د کمپاين ځواکونو د عملياتو پر مهال د يوې کورنۍ اووه غړي شهیدان شوي دي.
د خوست د امنيه قومندانۍ د امنيت امر، سمونوال عبدالحنان ځدراڼ، وايي، چې دغه عمليات تېره شپه د کمپاين ځواکونو د يادې ولسوالۍ اړوند د بټۍ تاڼې په سيمه کې ترسره کړي دي.
د يادې کورنۍ يوه غړي علي جان امریکا غږ ته ويلي، په پېښه کې د ده پنځه ورونه، يو وراره او يو د تره ځوی وژل شوي دي.
شهیدان شوي ملکي وګړي: محمد ولي، نورالدین، قدم، اختر ګل، محمد دین – دا وروڼه وو او د ماجسکي زامن وو. ګل محمد یي وراره (د محمد دین زوی) و او نجیب یې د تره زوی و.
شهیدان شوي کسان په قوم کوچیان، پطي خیل، وو او د خوست ولایت د علیشېرو ولسوالۍ د بتۍ کلي اوسېدونکي وو.
سيمه ييزې سرچينې وايي، وژل شويو کسانو له هيڅ کومې وسله والې ډلې سره اړيکې نه لرلې.
د کمپاین عسکرو څو شپې مخکې هم د خاني خوړ په سیمه کې دوه وروڼه شهیدان کړي وو.
تر دې وړاندې هم په خوست او څنګلورو ولایتونو کې امنیتي ځواکونو عام ملکي وګړي د طالبانو په نوم شهیدان کړي دي.
پکتیا: ځانګړو ځواکونو ځوان شاعر شهید کړی
د وزې ځدراڼ خلکو د شاعر اسدالله د وژنې له امله د خوست – ګردېز لویه لار تړلې وه
په خوست کې ميشت د کمپاين ځواکونه تر ډېره د امريکا له خوا تمولېږي او ډېری مهال له امریکايي ځواکونو سره په ګډه عمليات کوي.
په وروستيو څو مياشتو کې د ګډو ځواکونو زياتېدونکو شپنيو عملياتو او هوايي بريدونو کې د ملکي خلکو مرګ ژوبله هم ډېره شوې ده.
