تبصره
د جنوبي اسيا او افغانستان لپاره چې ټرمپ کومه سټراټيژي جوړه کړه، په هغې کې په افغانستان کې سولې ته هيڅ ځای نه دى ورکړل شوی، ټوله په جګړو، بمباريو او افغان وژنو څرخي. د همدې پاليسۍ په پلې کولو سره، په افغانستان کې امريکايي او افغان هوايي ځواکونو د زیات واک په ترلاسه کولو پر افغان ولس بمباري څو چنده زياته کړه.
د امريکا د هوايي ځواکونو قوماندان، جنرال جیمز هکر، په پنټاګون کې خبريالانو ته په وينا کې ويلي چې په افغانستان کې به پر طالب وسله والو د بمونو باران جوړ کړي. د جیمز هکر تر وينا مخکې پنټاګون اعلان کړی و، که طالب وسله وال له جګړې لاس نه اخلي، د هوايي بمبار په دوام او زياتوالي به یې له منځه يوسو.
په تېرو ١٧ کلونو کې، د جګړې دوام په وار وار ښوولې ده، چې کله هم د طالبانو پر خلاف د امريکايي جنرالانو ژبه ترخه شوې ده او پر طالبانو او افغان ولس یې بمباراو شپني ړانده عمليات زيات کړي دي، په مقابل کې طالبانو هم پر بهرنيانو او د بهرنيانو په ساتونکو افغان پوځونو بريدونه زيات کړي دي، چې د دواړو خواوو ترمنځ د جګړې په زياتوالي تل ولس ته مرګوني تاوانونه اوښتي دي.
که د امريکايي هوايي ځواکونو قوماندان، جنرال جیمز هکر، او تر هکر دمخه نورو هوايي قومندانانو پر افغان ولس او طالبانو هوايي بمباري زياته کړې ده، طالبانو هم د خپلو بريدونو په زياتوالي په ورته عمل لاس پورې کړی او له افغان او امريکايي پوځي مشرانو یې د تيښتې لار ورکه کړې ده.
که د امريکا د هوايي پوځ قومندان طالبانو ته د بمونو د باران اخطار ورکوي، پخپله دې هم امريکا ته د امريکايي پوځونو د تابوتونو د کاروان انتظار وباسي. خو په دې شرط، که د امریکایانو ساتونکو او د هغوی د موخو تامینوونکي افغان پوځ لږ په خپل ګرېوان کې وکتل او خپله تنخواه یې حرامه وبلله.
اوس هغه پخوانى افغان پوځ هم نه دى چې د امريکا له جنګي قوماندو وروسته به یې پر افغان ولس د ټوپک شپېلۍ وراړوله. اوس په پوځ او پوليسو کې طالب وسله والو دومره نفوذ کړی چې تر طالبانو دمخه، په افغان پوځ کې د طالبانو نفوذي ملاتړي پر امريکايي پوځونو د ټوپکو شپېلۍ وراړوي او امريکا ته د تابوتونو کاروان لېږي.
اوس په افغان پوځ کې د غیرتي سرتېرو او وسله والو طالبانو هدف (د بهرنيو پوځونو له منځه وړل) يو شوی دى. که امريکايان پر افغان ولس او طالبانو د بمونو باران جوړوي، طالبان او په افغان پوځ کې دننه درېشي کړي مجاهدين هم امريکا ته د امريکايي پوځونو د تابوتونو کاروان لېږلو ته تيار دي.
تر اوسه طالبانو د درنو بمونو غورځوونکو الوتکو او بي-۵۲ له بمباريو سر نه دی ټکولی. طالبانو د خپلې خاورې او ولس په دفاع کې، دا هر څه پر ځان منلي. خو مرګونو بريدونو یې له امريکايي چارواکو او پوځي مشرانو د تيښتې لار ورکه کړې چې وخت په وخت افغانستان ته د نورو پوځونو د رالېږلو اعلان کوي.
امريکايي هوايي او ځمکنيو پوځونو په تېر ٢٠١٧ز کال کې پر افغان ولس تر ٣٠٠٠ زيات بريدونه کړي دي. خو د طالبانو په حوصلو کې د کمښت پر ځای لوړوالی راغلی، چې په کابل کې د تيرې مياشتې بريدونه یې جوت مثالونه دي.
که د امريکا د هوايي پوځ قوماندان افغانستان ته د بمبار لپاره د بلېک هاک لېزري څرخکو په ډاډ پر طالب وسله والو د بمونو د باران جوړلو وينا کوي، دمخه روسانو هم پر افغان ولس د بمونو بارانونه کړي دي؛ خو افغان ولس د روس ځکمني، هوايي او د هغوی ګوډاګي پوځونه په خپل ايماني قوت او افغاني غيرت تر پولو په یوه منډه واړول – داسې منډه، چې ټوله امپراطوري یې ورړنګه کړه.
دا مهال، په امريکا کې د سنا مجلس غړي نيوکي لري چې په افغانستان کې د ١٦زرو امريکايي پوځونو د جګړې لګښت د امريکا اقتصاد له زوال سره مخ کړی دى. خو افغان ولس، تراوسه د لوی رب په تکيه او مرسته د کوم تاوان او اقتصادي ستونزو يادونه نه ده کړې؛ پخه اراده او هوډ یې کړی دى چې د خپلو سرونو په قربانولو به امريکا ته د امريکايي پوځونو د تابوتونو کاروان لېږي، ان شاءالله.
