(کابل ټکی کام ۱۳۹۶ سلواغه ۱۹ فرید افغان)
په ناروې هیواد کې د پناه غوښتونکو یوې شورا په خپله تازه ترسره شوې څیړنه کې ویلي چې؛ په افغانستان کې په ورځنۍ توګه سلګونه کسان له خپلو خونو په تیښته دي.
د «رلیف ویبپاڼې»د خبر ترمخه د ناروې هیواد یاد تحقیقاتي او څیړنیز ټیم په خپل خپاره کړی راپور کې څرګنده کړې چې هره ګړۍ ۵۰ او په ورځنۍ توګه ۱۲۰۰ تنه افغانان د سختو جګړو او ړندو بمباریو له کبله په داخل کې کډوالۍ ته مخه کوي.
د څیړنې ترمخه؛ په تیرو دوو کلونو کې ۲ میلیونه افغانانو د سختو جګړو له کبله خپلې خونې پریښې دي.
په راپور کې راغلي؛ د سختو هوایی بریدونو او مخامخ جګړو له کبله هره ورځ ۱۰ ولسي افغانان وژل کیږي چې دا ډیره بوږنونکې مسئله ده.
راپور زیاتوي؛ په تیر ۲۰۱۷ کال کې دولسي افغانانو ترڅنګ په افغانستان کې ۱۷ بهرني مرسته رسوونکي هم وژل شوي او ۳۴ نور ټپیان دي.
د دې شورا مشر «جین اګلند» دافغانستان له ګاونډیو او اروپایي هیوادونو غوښتي تر څو له خپلو هیوادونو څخه د افغان کډوالو د ایستلو لړۍ ودروي.
د یادونې وړ ده چې دې ادارې په تیر کې هم ویلي و، چې په افغانستان کې ۷۰ سلنه ملکیان له سخت ګواښ سره مخ دي.
د یادونې وړ ده چې څو ورځې وړاندې ګارډین ورځپاڼې هم په یوه راپور کې ویلي و، چې افغانستان ته ورغلي غوڅ اکثریت کډوال په دې هڅه کې دي چې له خپل هیواد څخه بیرته ژر ووځي.
ورځپاڼې د دې لامل بیکاري، جګړې او پراخې هوایي بمبارۍ ښودلې وې.
