(کابل ټکی کام، ۱۳۹۶، سلواغې ۲۲) د افغانستان د مهاجرينو او بېرته ستنېدونکو چارو د وزارت مطبوعاتي سلاکار حفيظ احمد مياخيل وايي، په ۲۰۰۷ميلادي کال کې شپږ لکه افغانان د جګړو، خراب اميتي وضعيت او نورو ستونزو له کبله بې ځايه شوي دي.
نوموړی وايي، ډيری خلک په هغو ولايتونو کې بې ځايه شوي چې جګړې پکې زياتې کېږي او د امنيت له پلوه خوندي نه دي.
د مياخيل په وينا، د مهاجرينو چارو وزارت هڅه کړې چې بې کوره کډوالو سره لازمې مرستې وکړي.
دا په داسې حال کې ده، چې د تير کال په وروستۍ مياشت کې د مهاجرينو لپاره د ملګرو ملتونو د عالي کمشنرۍ په خپل راپور کې ويلي و، چې د تېر يوه کال په ترڅ کې ديارلس لکه او دېرش زره افغانان د بې ځايه شويو کورنيو په توګه ثبت شوي دي.
د يادونې ده، په ۲۰۱۷م کال کې لکونه افغانان له ايران او پاکستان څخه بېرته هېواد ته راستانه شول خو د هېواد د خراب امنيتي وضعيت، بې کارۍ او جګړو له کبله غواړي بېرته بهرنيو هېوادونو ته ولاړ شي.
د دولتي ځواکونو او طالبانو تر منځ په جګړو کې ډېر کله ملکيانو ته زيان اوړي، ګڼ ميشتي ځايونه او کلي په توپونو او هوايي بريدونو کې په نښه کېږي.
