(کابل ټکی کام، ۱۳۹۶، سلواغې ۲۲) يو شمير سياسي شنونکي وايي، په هېواد کې زياتېدونکو هوايي بريدونو د ملکي مرګ ژوبلې کچه لوړه کړې چې دغه چاره د افغانستان روان وضعيت لاپسې کړکيچن کولی شي.
سياسي شنونکي يوسف امين ځاځي مسير ورځپاڼې ته د بهرنيو او داخلي ځواکونو په هوايي بريدونو کې د ملکي خلکو مرګ ژوبله د اندېښنې وړ مسله بولي زياتوي چې ډېرېدونکي هوايي بريدونه د طالبانو ليکي نه شي کمزورې کولای او يواځې به ملکي مرګ ژوبله زياته کړي چې د هېواد امنيتي وضعيت د لا خرابېدو سبب ګرځي.
دغه راز د چارو يو بل شنونکی حليم شملزی هم په دې باور دی، چې هوايي بريدونه د وسله والو په ليکو اغيز نه شي کولای په خبره يې چې پر ملکي خلکو ظلمونه، هوايي بريدونه، پر ملکي مرګ ژوبلې د حکومت چوپتيا، بې عدالتي د دې لامل کېږي چې د طالبانو ليکې پاوړې او د دولت سره د خلکو کرکه نوره هم زياته شي.
دوی نيوکه کوي، چې حکومت ملکيانو ته پر اوښتې مرګ ژوبلې پټه خوله دی او هيڅکله يې په هوايي بريدونو کې ملکيانو ته د مرګ ژوبلې اوښتو د مخنيوي لپاره اقدام نه دی کړی.
څه موده مخکې ځينو امریکايي او افغان چارواکو وويل: چې دوی به په خپلو هوايي بريدونو کې زياتوالی راولي، له بي ۵۲بم غوروځونکو الوتکو به هم کار واخلي او ګواښ يې وکړ چې د بمونو بارانونه به ووروي.
په داسې حال کې د هوايي بريدونو پر ډېرېدو اندېښنې څرګندېږي چې تازه په غزني کې د يوه هوايي بريد له کبله څلور ماشومان ووژل شول او يو ټپي شو، دغه راز وړمه ورځ هم په خوست ولايت کې د کمپاين عسکرو په عملياتو کې د يوې کورنۍ اووه تنه ووژل شول چې ټول يې ملکيان او عام خلک و.
