داودافغان:طالبانو په هلمند کې د ټولو مکاتبو دخلاصون ژمنه کړې اوس له بهانې پرته هيڅ خنډ نه شته

(کابل ټکی کام ۱۳۹۶ سلواغه۲۴ فرید افغان)

د پوهنې وزارت استازی او مدني فعال داود افغان پر خپل فسبوک پاڼه لیکلي چې په هلمند ولایت کې یې د طالبانو له مشرانو او مسؤلینو سره کتلي او هغوی ورته په دې برخه کې د بشپړې همکارۍ ډاډ ورکړی دی.
نوموړی وایي؛ له طالب استازو سره مو د ښونځیو په بیا خلاصون، او یو شمیرو نورو مواردو خبرې وکړې چې ټولې ومنل شوې.

په هغه توافقنامه کې چې د پوهنې ریاست د ټیم او طالبانو تر منځ لاسلیک شوې، راغلي چې؛ اسلامي امارت د مدارسو، مکاتبو او ټولو اداري تعمیراتو حفاظت په ښه توګه ترسره کوي او دا یې دځان مسؤلیت بللی دی.
همداراز ،حکومتي لوری به د ټولو تړلو مدرسو او ښوونځيو د بيا پرانستلو په اړه به جدي هڅې کوي ، طالبان به په کامل اطمينان سره د ښونځیو نظارت ترسره کوي او ترڅنګ به یې هغوی د معارف اړوند د هیڅ ډول ودانيزو پروژو د پلې کولو مخه نه نیسي .
له دې سره سره به د معارف د ټولو غصب شويو ملکيتونو بيا خلاصول او معارف ته تسليمول، د طالبانو له خوا د معارف د نصاب د تدریسي کتابونو او قرطاسیې ډاډه انتقال، په لري پرتو سيمو کې د همکارو موسساتو لخوا د زده کوونکو لپاره د ټولګيو تاسیس ته اجازه او ورته نوري مادي شاملي دي.

طالبانو ژمنه کړې چې که ددوي تر لاس لاندې سيمو کې هر نظامي يا ملکي کس د ښوونځي د پرانستلو په اړه خنډ جوړاوو، د هغوی لخوا به په سزا رسول کیږي.
د افغان په خبره؛ اوس د ټولو تړلو ښوونځيو او ديني مدرسو د بيا پرانستلو په اړه له بهانې پرته هيڅ خنډ موجود نه دی.
افغان پر خپله فسبوک پاڼه د طالبانو له همکارۍ مننه کړې او زیاتوي “ زه د خپل کارنده ټيم په استازيتوب د طالب وروڼو لخوا د پوهنې د روان بهير سره د همېشنیو او بې درېغه همکاريو څخه غرونه، غرونه مننه کوم، او په دې سپېڅلې لاره کې يې د بري هيله کوم.“
د یادونې وړ ده چې د هیواد په مختلفو برخو کې سلګونه ښوونځي د طالبانو تر واکمني لاندې دي چې اړوندان یې د ښې روزنې، او پابندۍ څخه خوښ دي او زیاتوي چې د طالبانو له پوهنیز بهیر څخه راضي دي.
د یادونې وړ ده چې په تیر کې د هلمند په څیر یو شمیر ولایتونو کې د طالبانو په پلمه دولت په لوی لاس ښونځي تړلي چې طالبانو او سیمیزو ولسونو یې په ځلونو د خلاصون غوښتنه کړې خو نه ده منل شوې.
داځل هم طالبانو په دې ولایت کې د دې بهیر د پیل غوښتنه کړې وه.
باید وویل شي چې د هیواد په ځینو برخو کې اوس هم د طالبانو له نوم څخه په استفادې حکومتي چارواکو خیالي ښوونځي او روغتیایي مراکز د خپلو شخصي ګټو په خاطر ثبت کړي ، خو طالبانو په ځلونو ډاډ ورکړی چې دوی له ټولو عام المنفعه چارو ملاتړ کوي او په دې بهیر کې یې دکاملې همکارۍ او مرستې ډاډ هم ورکړی دی