سټولټنبرګ: افغانستان کې به د ناټو ځواکونو شمېر شپاړلس زرو ته لوړ شي
(کابل ټکی کام، ۱۳۹۶، سلواغې ۲۵) د ناټو عمومي منشي ینس ټولټنبرګ وايي، په افغانستان کې د ناټو ځواکونو شمېر لوړوي.
ويل کېږي، په کابل او ځينو نورو ولایتونو کې له وروستيو بريدونو وروسته او د افغانستان امنيتي وضعيت ته په کتو د ناټو غړو هېوادونو دفاع وزيران په بروکسل کې يوه بله غونډه کوي.
خو د دغې غونډې له جوړېدو مخکې ینس سټولټنبرګ په افغانستان کې د ناټو ځواکونو په ډېرولو ټينګار کړی او ويلي يې دي، په دې هڅه کې دی چې د دغو ځواکونو شمېر شپاړلس زرو ته لوړ کړو “دا شمېره به د پخوانۍ ژمنې په پرتله چې ۱۳ زره سرتېري وو، لوړه وي”
په داسې حال کې د ناټو ځواکونو د ډېرولو خبره کېږي چې د افغانستان لپاره د ټرمپ د نوې ستراتيژۍ له اعلان وروسته امريکا هم د خپلو ځواکونو د ډېرولو اعلان وکړ.
د افغانستان او سيمې لپاره د امريکا نوې تګلاره تر ډېره جنګي بڼه لري او امريکايي چارواکي د افغانستان حل لاره په جګړه کې لټوي.
خو د چارو شنونکي په دې باور دي، چې په افغانستان کې د بهرنيو سرتيرو ډېرول به جګړه لا نوره توده او اوږده کړي، زياتوي که بهرنيان رښتيا هم غواړي چې د افغانستان ستونزه حل شي نو د خبرو او سولې لپاره دې خپلې هڅې ګړندۍ کړي.
ناټو اوس مهال په افغانستان کې څه باندې ديارلس زره پوځيان لري چې د دولتي ځواکونو په روزنه، سلا مشورو ورکولو سربيره په ځينو هوايي او ځمکنيو عملياتو کې هم ګډون کوي.
تېر کال د شمالي انتلانتيک سازمان د غړو هېوادونو د دفاع وزيرانو په غونډه کې د ناټو منشي ويلي و، چې د طالبانو د ماتولو لپاره به افغانستان ته درې زره نور ناټو ځواکونه واستول شي.
چې طالبانو يې هم پر وړاندې غبرګون ښودلی و او وياند يې ذبيح الله مجاهد ويلي و، چې د ناټو مشران بايد درک کړي چې طالبان مات شوي نه دي ” هغه خلک دي چې د خپلي عقيدې او هيواد څخه د دفاع لپاره يې د ناټو په مشرۍ د نړۍ نيم ميليون هغه ځواک په ګونډو کړ چې په ټولو عصري وسائلو او ټکنالوجۍ سمبال وو”
