(کابل ټکی کام، ۱۳۹۶، سلواغې ۲۸) د امريکا د دفاع وزارت يا پنټاګان د څارنې او تفتيش اداره، په افغانستان کې د تېرې شپاړلس کلنې جګړې د بريا او ناکاميو په اړه شک څرګندوي زياتوي چې په افغان جګړه کې د مهمو معلوماتو پر خپرولو بنديز د دې لامل شوی چې د جګړې د ګټې او ناکامۍ په اړه دې قضاوت وکړای شي.
د امريکا د دفاع وزارت د څارنې عمومي ادارې په خپل پروني راپور کې ويلي، امریکا د نوې تګلارې له اعلان وروسته افغانستان ته درې زره پنځه سوه نور ځواکونه ولېږل، په هوايي بريدونو کې زياتوالی راغی او امريکايي ځواکونو ته لا ډېر صلاحيتونه ورکړل شول خو افغان حکومت د ۲۰۱۷م کال تر پايه په دې ونه توانېد چې د ځمکې د حاکميت دایره پراخه کړي.
د امريکا ولسمشر د تېر کال په اګست مياشت کې د افغانستان او سيمې لپاره نوې تګلاره اعلان کړه چې د شنونکو په باور تر ډېره په جګړې ولاړه ستراتيژي ده.
راپور زياتوي، په دې اړه پريکړه کول چې نوې تګلاره به طالبان اړ کړي چې د حکومت سره د سولې خبرې وکړي هم له وخت مخکې خبره ده.
د پنټاګان د څارنې ياده اداره وايي، د امريکايي ځواکونو له زياتېدونکو هوايي بريدونو سره طالبانو هم خپلو پراخو بريدونو ته زور ورکړی دی او په هېواد کې نا امنۍ له پخوا زیاتې شوي دي.
راپور کې راغلي، ځينې مهم معلومات لکه د افغان ځواکونو د مرګ ژوبلې شمېرې پټول، د هغوی د جنګي حالت د چمتووالي په اړه معلومات او پر يو لړ نورو مهمو معلوماتو بنديز لګول، د امريکا د نوې ستراتيژۍ د اغيزمنتيا ارزول ستونزمن کړي دي.
