غیبت دقرآن او حدیثو په رڼا کې

سلیمان حقاني

باسمه تعالی
نحمده ونصلی علی رسوله الکریم وبعد: په موجوده عصر کې اکثره خلک دغفلت او بي توجهی له امله په قسما قسمه ګناهونو کې اخته دي، نو په علماوو لازم
دي چې په دی باره کې پوره توجه ولري او په هری ممکنې طریقي او لاري سره چي وی خلک دغفلت له خوب څخه راویښ کړي· دخرابو او لویو ګناهونو د جملې څخه یوه لویه او کبیره ګناه غیبت دی چي مسلمانان پکی شپه او ورځ مبتلاء او اخته دې چی غیر له وخت ضایعه کولو او ځان مصروفولونه بله کومه فائده نه لری بلکی بر عکس دنیاوی او اخروی نقصانات لرې غیبت هغه لویه ګناه ده چې شریعت کې یي تشبیه دزنا او عفت ضد منافي عمل سره ورکول شوی ده لکه یو حدیث کې رازي (الغیبة اشد من الزناء) غیبت له زنا څخه هم بد عمل او ګناه ده
دغیبت تعریف
غیبت داول حرف په کسری سره دچا عیب دهغه په غیاب کې بیانول، یا چاپسي بدویل دهغه به غیاب کی یا دچا بد ګویي بیانول دهغه په غیاب کې·
درسول الله صلی الله علیه وسلم له نظره دغیبت تعریف.
{رسول الله صلی الله علیه وسلم وفرمائل: اتدرون مالغیبة؟ ذکرك اخاك بما یکره · قیل افریت ان کان في اخي ما اقول؟ قال: ان کان فیه ماتقول فقد اغتبته وان لم یکن فیه فقد بهته}
ترجمه: آیا پوهېږۍ غیبت څه شي دی؟ (رسول الله صلی الله علیه وسلم په خپله ځواب ورکړ) داچي ورور دي په داسې څه سره یاد کړی چې هغه پرې خفه کیږي (یو صحابی ) عرض وکړ که هغه څه چی زه یي وایم زما په ورور کې موجود وي رسول الله صلی الله علیه وسلم وفرمائل: هغه څه چی ته یي وایي که په هغه کې وی نو تا دهغه غیبت وکړ او که هغه پکې نه وي نو تا په هغه تهمت وتړلو.
امام نووي (رح) ددي حدیث په شرح کې لیکلې: برابره خبره ده که دي مسلمان ورور په ژبه کتابت او لیکلو سره په هغه څه سره یاد کړ چې هغه یي نه خوښوی یا په رمز او اشارو سره په سترګو لاسونو یا سر سره یاد کړ دا ټول په غیبت کې داخل دی.
قرآن کریم غیبت دمړه ورور دغوښې خوړلو سره تشبیه کړی.
الله تعالی فرمائي: ولا یغتب بعضکم بعضاً ایحب احدکم ان یأکل لحم اخیه میتاً فکرهتموه واتقوا الله ان الله تواب رحیم
ترجمه: او غیبت مه کوی ځنې دځینو نورو آیا داخبره خوښه وي یو کس ستاسي چې وخوری دخپل ورور غوښه په داسی حال کې چې هغه مړوی نو ددغه کار نه نفرت وکړۍ او دالله تعالی نه وویریږۍ بیشکه الله توبه قبلونکې مهربانه ده.
دغیبت منشاء:
دغیبت منشاء طعن، بدګڼل، عیب لټول، کبر او خود خواهی ده
کله چی انسان ځان لوې او نور خلک دځان څخه کم او سپک وګڼي نو په سوچونو او خبرو شروع وکړی …..
دغیبت کونکو سزاء:
علاءبن حارث رضی الله عنه درسول الله صلی الله علیه وسلم نه روایت کوی:
رسول الله صلی الله علیه وسلم وفرمائل: څوک چې په بې ګناه خلکو باندی تهمت ولګوی یا هغه څوک چي غیبت کوي دقیامت په ورځ به دسپیو په شکل پورته کړی شي
دابن عباس رضی الله عنه په روایت رسول الله صلی الله علیه وسلم دمعراج په شپه ځنې خلک ولیدل چي دمرداري غوښه یي خوړله رسول الله صلی الله علیه وسلم د جبرائیل علیه سلام نه پښتنه وکړه چی دوي څوک دي؟ جبرائیل علیه سلام وفرمائل: داهغه خلک دي چې دخلکو غوښه یي خوړله یعني غیبت یي کولو.
دغیبت دمرض علاج
{۱}دپرهیزګارۍ روحیه تقویه کول او خپل نفس دمراقبی او نظر لاندی ساتل.
{۲}مسلمان دي دا اومني چې ټولې خبری یي همیشه ثبت او لیکلی کیږي او دهغي په باره کې به تري پوښتنه کیږي.
{۳}ډیر دقت غور او پلټنه دنورو دقضاوت په وخت کې خاص هغه خبره چې په خلکو کې خوریږي.
{۴}خپله غوصه کنټرولول.
{۵}په مجلس کې کمی خبری کول او دچا نوم بغیر دضرورت څخه نه اخستل…
الله دي مونږ ټول مسلمانان ددي ناوړه او بد عمل څخه وژغوری او الله دی مونږ ټولو ته دنیکو اعمالو توفیق رانصیب کړی