غني: زور واکوانو ته نه تسلیمیږم او په لومړي سره کې مې ژمنه همدا وه

(کابل ټکی کام ۱۳۹۶ کب ۲ فرید افغان)

د ملي یووالي د حکومت مشر اشرف غني نن د قومي او جهادي مشرانو او د ولایتي شوراګانو استازو ته د سولې په اړوند په یو مشورتي کنفرانس کې وویل؛ چې د زور واکو څیرو زور به له منځه یوسي او د هغوی پرضد به ټینګه مبارزه کوي
نوموړی وویل؛ ما په لوړه کې د ابوبکر صدیق (رض) وینا هم ځکه تکرار کړه چې موږ زورواکي نه منو.
غني داسې مهال دا ژمنه تکراروي چې تازه یې د سمنګانو لرې شوی زورواکی والي د مکافاتو او لوړ پوسټ په ورکولو دندې پریښودلو ته راضي کړی، همداراز یې عطانور ته هم د مخالفت نه کولو او دندې پریښودلو له امله په وزارتونو، سفارتونو او ولایتونو کې وړاندیزونه کړي.
غني زیاته کړه؛ ارګ د سیاسیونو نه، بلکه د ملت کور دی او په وینا یې چې ارګ د جنجالونو مرکز نه دی.
غني پر وسلوالو مخالفینو هم غږ وکړ چې پر ملکي تاسیساتو دې بریدونه نه کوي، خو نوموړي د روانو بمباریو او شپینیو چاپو په اړه چې د ولسي خلکو بر کورونو وهل کیږي، څه ونه ویل.
غني ټینګار وکړ چې نوموړی د غازي امان الله خان د فکري لارې ملګری دی او د هغه تګلاره به تعقیبوي