(کابل ټکی کام، ۱۳۹۶، کب ۶) د مشرانو جرګې پخوانی مرستيال او د اجرائيه رياست سلاکار په کابل کې په يوه وسله وال بريد کې وژل شوی دی.
د سپوږمې راډيو د راپور له مخې، د جمعيت ګوند پر غړي او د اجرائيه رياست پر سلاکار رفيع الله ګل افغان تېره شپه ناوخته د کابل ښار په اوولسمه امنيتي حوزه کې د وسله والو تر بريد لاندې راغلی او وژل شوی دی.
د سرچينې په وينا، له نوموړي سره په دغې بريد کې دوه تنه ساتونکي يې هم وژل شوي دي.
رفيع الله ګل افغان د جمعيت ګوند غړی او د مشرانو جرګې پخوانی دوهم مرستيال پاتې شوی او اوس مهال د اجرائيه رياست سلاکار و.
تر اوسه پورې د دې بريد مسئوليت چا په غاړه نه دی اخيستی.
وخت ناوخت د طالبانو چريکي بريدګر هم د کابل ښار په ګډون په يو شمير نورو سترو ښارونو کې چارواکي او نظامي منسوبين د خپلو بريدونو هدف ګرځوي.
د يادونې ده، چې په دې وروستيو کې د جمعيت ګوند د شورا غړو او اجرائيه رياست تر منځ سياسي اړيکې يو څه ترينګلي شوي دي او آن تر دې چې يو بل ته يې ګواښونه هم کړي دي .
