(کابل ټکی کام ۱۳۹۶ کب ۶ فرید افغان)
شمالي کوریا د امریکایي مشرانو له پاروونکو خبرو او بندیزونو وروسته سخت غبرګون ښودلی او له دې هیواد سره یې د مستقیمو خبرو امکان په یو مخیزه توګه رد کړی دی.
وروسته تر هغه چې د ټرمپ مرستیال مایک پنس د شمالي کوریا د ولسمشر خور ، “کیم یو جونګ“ ته د شریرې کورنۍ خطاب وکړ، شمالي کوریا ویلي چې له ۱۰۰ تر ۲۰۰ کلونو چمتو نه دي، چې له امریکایانو سره خبرې وکړي.
دا په داسې حال کې ده چې د شمالي کوریا یو ۸ نفري پلاوی د جنرال «کیم یونګ چول» په مشرۍ د یکشنبې پر سهار سیول ته رسیدلی تر څو د المپیک سیالیو په اختتامیه مراسمو کې ګډون وکړي.
باید وویل شي چې؛ نوموړی د امریکا په تور لیست کې هم شامل ده.
پر نوموړي جنرال تور دی چې په ۲۰۱۰ کال کې یې د جنوبي کوریا یوه جنګي کشتۍ هدف ګرځولې وه، چې پکې ۴۶ کسان ووژل شول.
نوموړی به له ولسمشر مون جایه او نورو مشرانو سره هم وګوي.
امریکا وروسته ترهغه خپلو ګواښونو ته لازور ورکړ چې د شمالي کوریا او جنوبي کوریا لوبډلو د یو مشترک بیرغ لاندې د المپیک سیالیو کې ګډې لوبې پیل کړې.
امریکا د دواړو کوریاوو له اتحاد څخه په ویره کې ده او تیره ورځ یې هم د دې هیواد په لسګونو شرکتونو او سوداګرو بندیزونه ولګول.
شمالي کوریا هڅه کوي تر څو د امریکا او جنوبي کوریا تر منځ ملګرتیا کې خنډونه رامنځته کړي او خپلې اړیکې له دې هیواد سره له لسیزو وروسته بیا ورغوي.
