تفصیلي راپور
(کابل ټکی کام ۱۳۹۶ کب ۶ فرید افغان)
په داسې حال کې چې افغانستان د نړۍ په کچه څلورم فاسد هیواد اعلان شوی، رسنیو ته رسیدلي یوه برخه اسناد ښیي چې تر ټولو ډیر فساد په پوځي اداراتو کې ترسره شوی دی.
د هشدار خبري اژانس تر مخه؛ په وروستیو دوو اونیو کې د پولیسو د وظیفوي غفلت له امله ۴۶ عرادې وسایط له منځه تللي چې شاوخوا ۹۶۴،۵۷۸ ډالره زیان یې حکومت ته رسیدلی دی.
په دې لړ کې ۱۲۵ تنه محکمې ته ورپیژندل شوي چې څلور تنه یې جنرالان، ۹۰ تنه افسران، ۵۲ تنه ساتمنان، او ۶ تنه نور د کورنیو چارو د وزارت اړوند غیر نظامي مامورین تشکیلوي.
اسناد ښیي چې یواځې د پروان ولایت د ټیټ رتبه کارمندانو له معاش څخه ۳۱۶،۶۲۴ وهل شوې او د لوړ پوړو چارواکو اکاونټ ته جمع شوې دي.
هشدار ته رسیدلي معلومات ښیي چې ډیری غدر د هلمند له پولیسو سره شوی او په بې رحمانه توګه یې حق تلف شوی دی،چې د خیالي پولیسو دتنخوا وو سربیره چې چارواکي یې په بډه وهي د پولیسو له تنخواو هم فیصدي کټ کوي.
ویل کیږي چې د جوزجان ولایت د ۴۰ پولیسو معاش تر ۵۰۰۰ افغانیو کم دی خو بیا هم ترې مالیه اخیستل کیږي او د لوپړو چارواکو حساب ته جمع کیږي.
د کورنیو چارو په وزارت کې پر ۱۲۵ کسانو چې محکمې ته ور پیژندل شوي تور دی چې یواځې په تیرو څو میاشتو کې یې ۱۴۱،۳۶۴،۱۸۸ افغانۍ او۱۱۸،۲۳۷ ډالره فساد کړی او ټولې یې شخصي جیبونو ته وهلې دي.
همداراز اسناد ښیي چې په تیره میاشت کې یواځې د تیلو په قراردادونو کې ۲،۴۹۳،۵۰۰ افغانۍ وهل شوې دي.
باید وویل شي چې دې وزارت ته ولسمشر غني د فساد د زړه لقب هم ورکړی دی.
تر دې ور اخوا په هغه ارګان کې چې تر ډیره یې څارنه هم کیږي او تر خورا زیاتې توجه لاندې ده هم سلګونه لکه افغانۍ فساد شوی.
اسناد ښیي چې د ځانګړې قطعې په لیکو کې د مهماتو او تجهیزاتو د خرڅلاو او حیف میل له امله ۱۱۸،۲۳۷ ډالره تاوان د دولت بودیجې ته ورغلی دی.
هشدار ویلي چې دا یوه کوچنۍ بیلګه وه چې د دوی لاس ته ورغلې او دچارواکو له قوله یې ویلي چې په دې وزارت کې تر دې څو چنده زیات فساد شوی دی.
که څه هم د کورنیو چارو وزارت اوس د فساد پرضد دمبارزې ژمنې کړې خو څارونکي په دې اند دي چې تر څو دا بې کفایته چارواکي او د نړیوالو دا بې حسابه مرستې وي تر هغو به د فساد دسترخوان په ټولو دولتي اداراتو کې غوړیدلی وي.
باید وویل شي چې افغانستان څو ورځې وړاندې د نړۍ په کچه ۴ فاسد هیواد اعلان شو.
د شمیرو تر مخه؛ یواځې د ولسمشر د میرمنې دفتر په میاشتنۍ توګه ۲ میلیونه ډالر تنخوا لري او د ولسمشر تر ۵۰۰ ډیر سلاکاران هم د میاشتې سلګونه زره افغانۍ معاشات اخلي.
خو دا هر څه یواځې او د جګړو په لومړیو کرښو کې د جنګیالي عسکر تنخوا بل پلو ، چې هغوی ته حتی یو وخت په مړه ګیډه ډوډۍ نه رسیږي او بیا هم د هغو طالبانو پر وړاندې چې د دې فاسد حکومت وجود نه غواړي، مقابله او مبارزه کوي او له دې فاسد حکومت څخه دفاع کوي.
د سترې محکمې ویاند جمشید رسولي نن په یوه خبري ناسته کې وویل؛ چې د فساد شاوخوا ۱۵۰۰ دوسیې ورته رسیدلې چې غوڅ اکثریت یې لوړ پوړي نظامي چارواکي دي.
نوموړي زیاته کړه چې له ډلې یې ۴۰۰ دوسیې څیړلې او پر نورو کار روان دی .
