د امریکا د دفاع وزیر تېره ورځ افغانستان ته راغی. دلته یې له چارواکو سره د لیدنې وروسته وویل، چې دوی غواړي له طالبانو سره سوله وکړي. جمیز مټیس ونه ویل، چې امریکا کله له افغانستانه وځي، کله روانې جگړې ته د پای ټکی ږدي او کله دغه نابلل شوي مېلمانه«ناټو، امریکا او نور قراردادیان» له افغانستانه وباسي؟
د طالبانو ویاند ذبیح الله مجاهد له بي بي سي سره په مرکه کې گواښ وکړ، که امریکا له افغانستانه خپل ځواکونه ونه باسي، نو به یې په زور ایستلو ته مجبوره کړي.
نن د افغانستان لپاره د روسیې ځانگړي استازي ضمیر کابلوف هم ورته خبره کړې، چې امریکا د افغانستان له خاورې چین، ایران، منځنۍ اسیا او آن روسیه گواښي. په افغانستان کې د امریکا پراخ حضور سربېره بیا هم داعش پرمختگ کوي، د امریکا او ناټو په الوتکو کې داعشیان له ختیځ نه شمال ته لېږدول کېږي، د مخدره توکو کښت له نورو کلونو په پرتله ډېر شوی او اوس په هغو سیمو کې هم کرل کېږي، چې څو کاله وړاندې پکې چا نه پېژندل.
پرون په اسلام اباد کې د ایران د بهرنیو چارو وزیر جواد ظریف هم ورته خبره وکړه، چې په امریکايي الوتکو کې داعشیان له یوې سیمې بلې ته لېږدول کېږي او ایران دغه اندېښنې څو ځلې له نړیوالو سره شریکې کړي دي؛ خو نه افغان حکومت او نه امریکا پرې غبرگون ښيي.
دا اندېښنې یوازې له روسیې او ایران سره نه دي؛ بلکې چین هم په افغانستان کې د امریکا له دایمي حضور سره مخالف دی. امریکا او چین دواړه اقتصادي دښمنان دي؛ خو چین په جگړو کې ځان نه ښکېلوي او د امریکا خولې ته یوازې په خپلو تولید شویو توکو سوکان ورکوي.
افغانستان د سوریې په برخلیک اخته کېدونکی دی او د دغه برخلیک تر ټولو ډېره ونډه د امریکا او د افغان حکومت پر غاړو ده. امریکا په لوی لاس د سیمې هېوادونه په افغانستان کې جگړې ته راکش کوي، چې ښه بېلگه یې په واخان کې د امریکا بمباري او د یوې اډې جوړولو اعلانونه دي.
افغان دولت دا هر څه په خپلو سترگو گوري. حتا نه یې غندي، نه یې مخه نیولی شي او نه پرې غبرگون ښودلی شي.
تېره ورځ د امریکا ولسمشر ډونلډ ټرمپ د بهرنیو چارو وزیر له دندې گوښه کړ او پر ځای یې د سي اې ای پوځي مشر د بهرنیو چارو وزیر کړ. امریکا د افغانستان جگړه نوره هم استخباراتي کوي او ورځ تر بلې بېلابېل رنگونه ورکوي.
د جگړې ښکېلې خواوې، نړیوال او د سیمې هېوادونه باید نور امریکا ته ووايي، چې تاسې په کومه پلمه راغلي وئ، هغه پلمې اوس ختمې شوې. ستاسې حضور دلته په شر بدل و او شوی دی. دلته دې د عراق او سوریې لوبه نه گرموي او نه دې ځانونه پر موږ وژني او نه دې موږ وژني.
له سوریې بې سر پوښه تنور جوړ دی او امریکا، روسیه، د سوریې رژیم، ترکیه، ایران، برتانیه، ناټو او د نړۍ گڼ هېوادونه خپلې وسلې د سوریې پر مظلومو خلکو ازمايي.
موږ نه غواړو چې د سوریې په برخلیک اخته شو، بلکې غواړو نور ژوند وکړو او خپل حکومت او خپل چارواکي ولرو.
که امریکا دلته یوه ورځ نوره هم پاتې کېږي، نو د سیمې هېوادونه نور هم حساس کېږي او هغه اندېښنې به یې بې ځایه نه وي، چې امریکا غواړي د جگړې لمن تر چین او روسیې ورسوي.
