افغانستان کرکټ ملي لوبډله نن له ويسټ انډيز سره لوبه کوي
(کابل ټکی کام، ۱۳۹۶، کب ۲۴) د ۲۰۱۹م کال د نړيوال جام غوراوي سياليو په دوهم پړاو کې افغانستان نن د پنج شنبې په ورځ له ويسټ انډيز سره لومړنۍ لوبه کوي.
د غوراوي سياليو په لومړي پړاو کې افغان کرکټ ملي لوبډلې سکاټلنډ، زېمبابوی او هانکانګ ته لوبې بايللې وې خو پواينټونه يې ترلاسه کړي و او د نيپال له لوري هانکانګ ته په ماتې ورکولو افغانستان کرکټ لوبډلې د غوره شپږو لوبډلو (سوپرسکس) دوهم پړاو ته ځکله لاره وموندله چې د منډو اوسط يې پر نيپال او هانکانګ زيات و.
افغانستان د نړيوال جام سياليو ته د وتلو لپاره د درې نورو لوبو ګټلو ته اړتيا لري.
له ويسټ انډيز وروسته افغانستان له متحده عربي اماراتو او ايرلنډ سره هم لوبه لري.
دغه لوبې د زېمبابوی په کوربتوب او د دغې هېواد په مرکز هراري کې ترسره کېږي.
د ويسټ انډيز او افغانستان ټيمونو لوبې پر ځينو تلويزيونونو هم ښودل کېږي او ټاکل شوې ده چې نن د افغانستان پر وخت په دولس بجې پيل شي.
د دوهم پړاو سياليو په دور کې له شپږو غوره لوبډلو يواځې دوه به يې نړيوال جام سياليو کې لوبېږي.
