(کابل ټکی کام، ۱۳۹۶، کب ۲۴) د کابل امنيتي مسئولين وايي، چې د کابل ښار د دروازو امنيتي مسئوليت له پوليسو اخيستل کېږي او ملي اردو ته يې سپاري.
د کابل امنيې قوماندان داود امين رسنيو ته ويلي، چې له پوليسو د کابل ښار دروازو د امنیت مسئوليت ملي اردو ته د سپارلو لړۍ يوه اوونۍ مخکې پيل شوې او تر راتلونکې يوې میاشتې پورې به بشپړه شي.
داود امين زياتوي، دغه اقدام په پوليسو کې د فساد او د لوړو امنيتي ګواښونو له کبله ترسره کېږي زياتوي چې تر دې دمه د څلورو امنيتي دروازو مسئوليت ملي اردو ځواکونو ته سپارل شوی او تر راتلونکې يوې مياشتې پورې به دغه لړۍ بشپړه شي.
د هغه په وينا د دغې طرحې په عملي کولو سره به د کابل ښار امنيت کې ښه والی راشي او زياتوي چې : “څلور دروازې فعلاً تسلیم شوي دي، دا لړۍ روانه ده، د لوړو امنیتي ګواښونو موجودیت ته په کتو اړینه وه چې ملي اردو فعالیت وکړي، ځکه که زورواکي وسلې، وسایل او وسایط کابل ته لېږدوي اردو کولای شي چې مخه یې ونیسي.”
چارواکي په داسې حال کې ملي اردو ته د کابل ښار د امنيتي دروازو مسئوليت سپارلو خبره کوي چې تېره ورځ په افغانستان کې د امريکايي او ناټو ځواکونو قوماندان جنرال جان نيکولسن وويل، چې امنيتي مسئولينو سره د کابل ښار د امنيت ساتلو لپاره پوځي او استخباراتي همکاري زياتوي.
