رالیږونکی : محمد زبیر هاشمی
حضرت عمر”رض” د حمص له خلکو وغوښتل چې، په ښار کې د ټولو فقیرانو لست چمتو کړي، تر څو له بېت المال څخه ورسره مرسته وشي. کله چې د ښار فقیرانو لیست د حضرت عمر رض مخې ته کېښودل شو؛ نو ګوري چې د لیست منځ کې د حمص د والي حضرت سعید بن عامر”رض” نوم هم لیکل شوی دی.
د والي د نوم په لیدو حضرت عمر”رض” ټکان وخوړل او پوښتنه یې وکړه چې، د فقیرانو لیست کې د حمص والي نوم څه کړي؟
خلکو ځواب ورکړ چې نوموړی د ښار تر ټولو بېوزله کس دی. د دندې نه لاسته راغلې ټوله ګټه په نورو فقیرانو ویشي او ځان ته یې هېڅ نه پاتېږي. حضرت سعید “رض” وایي ، چې زه د الله تعالى په نزد دې خلکو ته مسؤل یم.
حضرت عمر “رض” وفرمایل چې، تاسې د هغه په ماموریت او رسمي کارونو کې نیمګړتیا وینئ؟
خلکو وویل هو! د هغه نیمګړتیاوې په درېو برخو کې دی:
۱-هغه یواځې له غرمې مخکې زموږ منځ کې لیدل کېږي.
۲-د شپې لخوا بیخي ورک وي.
۳-په اونۍ کې یوه ورځ له ټولو پټېږي.
کله چې امیر المؤمنین حضرت عمر “رض” دا پوښتنې له حضرت سعید “رض” وکړې؛ نو هغه وویل چې، هو دا نیمګړتیاوې لرم، دا ځکه چې، له غرمې وړاندې د کور اړتیاوې باید په خپله پوره کړم. مېرمن مې ناروغه ده خدمتګاره نلرم باید د کور کارونه هم پخپله وکړم.
دوهم: د شپې لخوا ځکه له خلکو پټ یم چې، د ورځې د دوۍ خدمت کړم او شپه مې یواځې د الله تعالى عبادت ته وقف کړې ده.
دریم: دا چې اونۍ کې یوه ورځ ما څوک نه ویني، علت یې دا دی چې، یوه جوړه جامې لرم. هغه وینځم او بیا منتظر یم چې، هغه وچې شي تر څو د خلکو په منځ کې راڅرګند شم.
د دې خبرو په اورېدو د حضرت عمر “رض” له سترګو بې اختیاره اوښکې راغلې او له بیت المال څخه یې یو څه اندازه پېسې ورکړې. حضرت سعید “رض” سم له واره همدا پېسې بیا په فقیرانو او بېوزلو خلکو و ویشلې او خپل کاري دفتر ته ولاړ.
