طالبانو په یوه نوې خپره شوې ویډیو کې د یو ځل بیا له افغان عسکرو غوښتي چې دندې پرېږدي او تسلیم شي.
د عبرت ۳ په نوم یاد فلم، چې د طالبانو پر رسمي ویبپاڼه خپور شوی، د هدفي وژنو په اړه دی او د ځینو هدفي او میزایل بریدونو صحنې هم پکې راټولې شوې دي.
طالبانو په دې فلم کې د خپلو هغو جنګياليو د روزنې صحنې رااخیستې دي چې د هدفي بریدونو لپاره روزل کېږي.
د فلم په پای کې، طالبانو د تېر په څېر یو ځل بیا پر دولتي ځواکونو غږ کړی چې دوی یې مقابل لوری نه دي او د ’بهرنیو اشغالګرو ‘ له ملاتړه دې لاس واخلي.
”زموږ غېږې ستاسو پر مخ پرانیستې دي. که تاسې تسلیم شئ، ستاسې سر او مال به، ان شاءالله، خوندي وي. تاسې به زموږ وروڼه وګرځئ او ستاسې تود هرکلی به وشي.“
