(کابل ټکی کام، ۱۳۹۶، کب ۲۹) ټاکل شوې ده، چې د ۲۰۱۹م کال نړيوال جام غوراوي سياليو په دوهم پړاو کې نن افغانستان له عربي اماراتو سره مخ شي.
ننۍ لوبه به د کابل پر وخت د غرمې په دولس بجې پېلېږي، خو د افغانستان کرکټ بورډ په خپلې رسمې فسبوک پاڼې ليکلي: چې ننۍ لوبه د کرکټ نړیوالې شورا د نوي مهالوېش له مخې د تلویزون له لارې په ژوندۍ بڼه نه خپرېږي.
افغانستان تر دې مخکې د غوراوي سياليو دوهم پړاو په شپږو غوره لوبډلو کې ويست انډيز ته ماتې ورکړه او د کرکټ ملي لوبډله دوه نورې لوبې له عربي اماراتو او ايرلنډ سره لري چې بايد ويې ګټي او ويسټ انډيز بايد سکاټلنډ او عربي امارات زېمبابوی ته ماتې ورکړې، ترڅو افغان لوبډله وکولی شي په نړيوال جام کې د لوبېدو لپاره چانس پيدا کړي.
د غوراوي سياليو دوهم پړاو له شپږو لوبډلو يواځې دوه ګټونکې لوبډلې به په ۲۰۱۹نړیوال جام کې د لوبېدو چانس لري.
له بله پلوه د کرکټ نړيوالې شورا ويلي، چې د افغانستان د کرکټ ملي لوبډلې کفتان اصغر ستانکزی بيرته خپلې لوبډلې سره يوځای شوی دی.
اصغر ستانکزی د غوراوي سياليو په لومړيو لوبو کې د پنډکس اپريش له کبله له لوبو وتلی و او د هغه پر ځای افسر ځای اخيستل شوی و.
تر اوسه معلومه نه ده، چې اصغر ستانکزی به بيرته لوبډلمشري په غاړه لري او که به د لوبغاړي په توګه به وي.
