د هرات پخواني والي او د اوبو، برېښنا او انرژۍ وزیر د کب پر ۲۴مه په هرات کې یوې غونډې ته وویل، طالبان باید د سولې خبرې له پخوانیو مجاهدینو سره پیل کړي او پخواني مجاهدین چمتو دي، چې د دواړو اړخونو ترمنځ د روغې جوړې هلې ځلې وکړي.
طالبانو د اسمعیل خان د وینا هرکلی وکړ او پخواني مجاهدین یې د سولې خبرو لپاره د قطر دفتر ته ور وبلل. د طالبانو له اعلامیې وروسته اسمعیل خان له خپلو پخوانیو خبرو تېر شو او حتا ترې منکر شو.
طالبانو له دې وړاندې څو ځلې ویلي وو، چې له امریکا او نړیوالو سره د سولې خبرې غواړي او د قطر دفتر دروازې د دوی پرمخ خلاصې دي.
خو نه امریکا، نه افغان حکومت او نه نړیواله ټولنه د طالبانو دفتر ته ځي او نه ورسره د سولې خبرې کوي. خو درې واړه لوري بیا د سولې په خبرو کې طالبان گرم بولي او د جگړې زیاتېدل طالبان سولې ته نه راضي کېدل ښيي.
د سولې خبرې یو وخت ډېرې گرمې شي او ټولو سره دا هیله پیدا شي، چې گوندې نور به امریکا له افغانستانه د خپلو پوځیانو ویستلو نېټه اعلان کړي او یا به اقلاً نړیوال تظمین ورکړي، چې د سولې د خبرو لهپاره مهم شرط دی. خو امریکايي چارواکو افغانستان ته خپل سفرونه ډېر کړي او داسې ښيي، چې روان کال به هم د جگړو، چاودنو، بمباریو او چاپو کال وي.
امریکا په تېرو اوولس کلونو کې د جگړې ټول زور وازمایه. امریکايي، ناټو، کرایه شویو او افغان ځواکونو په ټول زور د طالبانو د ماتې او له منځه وړلو له پاره جگړه وکړه؛ خو طالبان ورځ تر بلې ډېرېږي او ډېرې سیمې په خپل واک کې راولي.
که امریکا اوولس کاله نوره هم جگړه توده وساتي؛ نو بیا به هم یوه ذره بریا خپله نه کړي؛ ځکه د امریکا پر وړاندې پاڅون ولسي دی او د ولسي پاڅون مخه د نړۍ یو قوت هم نه شي نیولی.
د ملي یووالي حکومت د جوړښت له مهاله تراوسه په خپلو خپلمنځي اختلافاتو کې راگېر دی. کابینه تراوسه نیمگړې ده، د ولسي جرگې کاري موده پای ته رسېدلې، ټاکنې بې برخلیکه دي، د بلخ او ارگ اوږده لانجه په ډېرې غټې معاملې پای ته ورسېده، چارواکي باغیان دي، اداري فساد په برخه کې په ټوله نړۍ کې څلورم ځای لرو، بې کاري اوج کې ده او نیمايي خلک په لوږه ویده کېږي….
د حکومت د همدغه ضعف له امله طالبان د ملي یووالي حکومت سره د سولې خبرې نه کوي او امریکا ته ترجیح ورکوي؛ ځکه د جگړې مهم لوری امریکا ده؛ نه افغان حکومت. افغان حکومت هم د امریکا په اشاره جگړه کوي، امریکا يې تمویلوي، وسلې، پیسې، امکانات او حتا د ولسمشر غني میاشتنی معاش هم له امریکايي پیسو ورکول کېږي.
د سولې خبرې دې نه مسخره کېږي او نه دې هر څوک د سولې د خبرو له پاره د چمتووالي خبره کوي؛ ځکه سوله په پخه اراده، قوي عزم او خپلواکي غواړي، چې له بده مرغه زموږ چارواکي دغه خاصیتونه نه لري.
