د ننګرهار ښېوه کې د یوه کانال د رغولو چارې پیل شوې

کابل ټکی کام ۱۸لېندۍ/۱۳۹۴، احمدالله مهاجر
 د ننګرهار ولایت د ښېوې ولسوالۍ د اوبو یو کانال چې ځینې برخې یې زیانمنې شوې وې، د بیا رغولو لپاره یې کار روان دی.
د یادې ولسوالۍ ولسوال ښاغلي ډاکټر محمد اسماعیل د یاد کانال د ځینو زیانمنو شویو برخو پر رغولو باندې د خوښۍ ښودلو تر څنګ له ولایتي ادارې او نورو اړوندو ریاستونو څخه غوښتنه وکړه تر څو یادې پروژې ته ورته پر نورو پروژو هم کار پیل کړي.
د اسماعيل له قوله چې په ښېوه ولسوالۍ کې له کلونو څخه کوکنار نه دي کرل شوي، نو باید د بیا رغونې لپاره یې پوره پاملرنه وشي.
اسماعیل د سیمي خلکو ته په چارو کې د همکارۍ ډاډ ورکړ او له مسئولینو څخه یې د کانال د رغولو چارې د ورکړل شوي قراداد سره د سمې پر مخ وړلو غوښتنه وکړه.
د یاد ولایت استازي او کار پوه ښاغلي عبدالکریم صمیم د اوبو د کانال په اړه د مالوماتو د ورکولو تر څنګ وویل، د یاد کانال د زیانمنو شویو برخو ۱۴۶متره اوږدوالی، ۵متره ژوروالی، ۱متر او ۵۰سانتي پلن والی لري.
ده همدا راز وویل چې د یاد کانال د بیا رغونې لپاره ټول مالي لګښت چې څلور میلیونه افغانۍ کیږي د نشه یي توکو سره د مبارزې وزارت له خوا ورکړل شوی دی.
ده وویل چې یاد کانال د ۶میاشتو په موده کې د اوبو لګولو ریاست په چوکاټ کې د انهار نومې شرکت له لورې جوړیږي.
صمیم هم د شرکت مسئولینو څخه د یاد کانال د چارو د ورکړل شوي قرارداد سره سم پر مخ وړلو غوښتنه وکړه.
د سیمې قومي مشران د یاد کانال بیارغونه یو ښه کار وبللو او ویې ویل چې یاد کانال ۸کیلومتره اوږدوالی لري، چې کلونه وړاندې یې ۱۵۰۰هکتاره ځمکه خړوبوله.
دوی همدا راز وویل چې د کانال زیانمنه شوې برخه مخکې هم د پي آر ټي او نشه یي توکو سره د مبارزې ریاست د رغولو لپاره همکاري وکړه، دوی وایي چې په کمه موده کې یاد کانال بېرته تخریب شو، خو د دوی له قوله چې یاد ریاستونه یې وخت پر وخت له کارونو څخه څارنه کوي.