(کابل تکی کام ۱۳۹۷ وری ۱۲ فرید افغان)
د افغانستان د آزادو رسنیو څخه د ملاتړ بنسټ “نی“ وایي چې حکومت لسګونه خبریالان د دې په خاطر چې د ارګ په ګټه تبلیغات وکړي او له نیوکو یې ځواب ووایي په مختلفو رسنیو کې ګمارلي.
د دې بنسټ رئیس مجیب خلوتګر رسنیو ته ویلي ؛ ارګ له څلورو ولایاتو څخه ۵۰ تنه تکړه خبریالان د دې کار لپاره په لوړو تنخواوو ټاکلي او له حکومت څخه د دفاعي قوت په څیر چلند کوي.
خلوتګر وایي؛ دا چاره د رسنیو پر فعالیتونو د کمرنګه کولو لپاره ترسره کیږي چې په وینا یې دا ډله خبریالان د حکومت په ګټه تبلیغاتي سانسور مخ پر وړاندې وړي.
که څه هم حکومت دا تور رد کړی خو د نی بنسټ ویلي چې له اسنادو او شواهدو سره په دې تړاو له حکومت سره بحث ته تیار دي.
باید وویل شي چې د ملي یووالي حکومت له وړاندې د ټولنیزو رسنیو فسبوک او ټویټر لپاره ګڼ کسان په لوړو تنخواو ګمارلي ،تر څو په ټولنیزو رسنیو کې روان وضعیت د حکومت په ګټه انځور کړي.
چې تیر کال په همدې اساس یو مکتوب هم له امنیت شورا څخه د تواب غورځنګ په نوم نشر شوی و، چې پکې په ټولنیزو رسنیو کې د ارګ د تبلیغاتي ټیم نومونه راغلي و.
