(کابل ټکی کام، ۱۳۹۷، وری ۱۵) د روزګان ولایت څخه د ورکړل شويو راپورونو له مخې، تېره شپه سلګونو وسله والو طالبانو په خاص روزګان ولسوالۍ کې په دولتي پوستو بريدونه کړي، چې په ترڅ کې يې عسکرو ته درنه مرګ ژوبله اړولې ده.
د طالبانو وياند قاري يوسف احمدي بريدونه تاييدويي په خبره يې تر دې دمه څلور پوځي مرکزونه نيول شوي او جګړه لا هم روانه ده.
ښاغلی احمدي زياتوي، په دې بريدونو کې پنځه دېرش عسکر وژل شوي او څوارلس عسکر طالبانو ژوندي نيولي دي.
نوموړی وايي، له نيول شويو پوځي مرکزونو يې په زياته اندازه وسلې او پوځي مهمات هم ترلاسه کړي دي.
يوې سيمه ييزې باوري سرچينې د دغې بريدونو د تاييد ترڅنګ وویل، چې طالبانو تېره شپه د سيمه ييزو پوليسو او ملي اوردو عسکرو پر مرکزونه بريدونه کړي او هغوی ته يې درنه مرګ ژوبله اړولې ده خو د اوښتو تلفاتو په اړه يې کره معلومات ورنه کړل.
دا په داسې حال کې ده، چې تېره ورځ د افغانستان دفاع وزارت دعوه کړې وه چې په خاص روزګان کې د هوايي بريدونو په ترڅ کې اوو تنو وسله والو ته مرګ ژوبله اړولې ده.
د يادونې ده، چې د خاص روزګان ولسوالۍ مرکز له ډېرې مودې راهيسې د طالبانو تر کلکې کلابندۍ لاندې دی او د دغې ولسوالۍ په ټولو سيمو طالبانو واکمن دي.
