(کابل ټکی کام ۱۳۹۷ وری ۱۶ )
راپور تاژ: فرید افغان
د حمل په ۱۳ نیټه د کندوز د دشت ارچي اړوند د لغمانیو په کلي کې داسې مهال هوایي بریدونه وشول چې زرګونه تنه ولسي خلک د دستاربندۍ د مراسمو په ویاړ راټول شوي و.
د سیمې خلک وایي؛ برید داسې مهال ترسره شو چې خلک تر جلسې وروسته ډوډۍ ته ناست و، او په وینا یې چې لومړی بم هم د ماشومانو په تجمع باندې را وغورځول شو چې وروسته دخلکو منډې شوې او چورلکو هم د دهشکې ناتاره فیرونه کول.
وروستۍ شمیرې ښیي چې په یاده بمبارۍ کې ۱۰۰ تنه ولسي خلک وژل شوي چې ۸۰ تنه یې یواځې ماشومان تشکیلوي.
د حکومت ادعا:
د دفاع وزارت ویاند محمد رادمنش له پیښې سملاسي وروسته په بیړنۍ توګه د پیښې مسؤلیت ومانه او دا یې د خپلو ځواکونو ابتکار وباله.
رادمنش د ملکي مرګ ژوبلې څخه د چورلټ انکار ترڅنګ د ۱۸ طالب مشرانو د وژلو او ۳۰ د ټپي کیدو خبر تکراراً مطرح کوله.
پر ټولنیزو رسنیو کې د ملکي مرګ ژوبلې د کره ثبوتونو له امله ارګ او یونما اړ شول ترڅو سیمې ته خپل څیړنیز پلاوي واستوي او پیښه له نږدې بررسي کړي.
دفاع وزارت هم څه تنزل وکړ ،د طالبانو له نظامي غونډې یې دستاربندي منلو ته زړه ښه کړ د ملکیانو مرګ ژوبله یې تائید کړه خو په خبره یې هغه طالبانو ویشتلي.
دې وزارت یوه ویدیو هم خپره کړه چې پکې د یادې غونډې بهر یو وسلوال شخص د جلسې امنیت ساتنه کوي.
غبرګونونه:
مشرانو جرګې داپیښه قتل عام وباله د غندلو تر څنګ یې یادې سیمې ته د څیړنې لپاره یې یو استازی ور ولیږه .
ولسي جرګې د حکومت له خوا خپره شوې ویدیو جعلي وبلله او حکومت یې پر ولس وژنې تورن کړ.
ولسي جرګې د عاملینو مجازات هم وغوښته او په ټینګار سره یې وویل چې پیښه باید هر اړخیزه وڅیړل شي.
پخواني ولسمشر حامد کرزي شرمونکی جنایت وباله او ګلبدین حکمتیار، عمر داودزي او ګڼو نورو مشرانو هم وغندله.
د سیمې خلک:
ځایي خلک وایي برید یواځې پر ولسي خلکو شوی او طالبانو ته هیڅ زیان نه دی رسیدلی.
دوی وایي؛ داچې ساحه د طالبانو تر واک لاندې ده نو پر همدې اساس د جلسې د امنیت ساتنې لپاره څو تنه طالبان د جلسې بهر ولاړ و، چې په جلسه کې یې ګډون نه درلوده.
دسیمې ځوان فعال فرید احمد کاکړ طلوع نیوز ته وویل؛ د حکومت ادعا هیڅ بنیاد نه لري حکومت چې کوم طالبان یادوي ټول ژوندي دي، د طالبانو یو غړی هم نه دی وژل شوی او بمبار پر ماشومان د ډوډۍ پرمهال شوی دی.
په ویدیو کې د سپین بیرغ موضوع هم حکومت د دلیل په توګه کاروي کوم چې عموماً په هره مدرسه کې نصب وي او تر لاندې یې د اړوند مدرسې نوم حک وي چې دلته هم همداسې وه.
سیاسي شنونکي وايي؛ حکومت د دې پرځای چې د دې برید له امله له خلکو بښنه وغواړي لا هم دا برید توجیه کوي.
څیړندویه ډلې څه وایي؟ !
د عدالت غوښتنې ډلې غړی عزیز احمد تسل امریکا غږ ته ویلي؛ لومړنۍ څېړنې ښيي؛ د افغان ځواکونو په هوايي بريد کې له ۵۰ زيات ملکيان وژل شوي او شپيته تنه نور ټپيان دي
د تسل په خبره، وژل شوي ډیری يې ماشومان دي چې عمرونه يې له دولس څخه تر اتلس کلونو پورې دي
طالبان یې په اړه څه نظر لري؟
طالبانو وروستی پیغام په پنځو نقطو راڅرخولی د شهیدانو او ټپیانو له کورنیو سره یې خواخوږي څرګنده کړې، له څیړنیزو ټیمونو یې د بې پرې څیړنو ترسره کول غوښتي، له رسنیو څخه یې د آزادو خبرونو د نشر غوښتنه کړې، له لیکوالانو یې غوښتي چې د یاد برید په اړه د ګډوځواکونو مخفي دسیسې له ولسونو سره شریکې کړي او د ملکیانو د غچ اخیستلو په خاطر یې له ګډوځواکونو څخه د انتقام اخیستلو ژمنه هم کړې.
ولې دا برید؟
د سیاسي چارو کارپوه عبدالرحیم ثاقب د ګڼو دلایلو په منځ دا هم ویلي چې؛ ډیری افغانان اوس هم په دې نظر دي چې وايي که د امریکايي ځواکونو شرارت نه وي خپله افغانان که هغه طالبان دي او که حکومتي اړخ ، یوه ورځ نه یوه ورځ به خامخا د خپلو دیني او ملي مشترکاتو او هیوادني مصلحتونو له وجې په خپل منځ کې سره جوړ او روانې جګړې ته به د پای ټکی ږدي.
خو امریکایان د خپلو نورو جنایاتو ترڅنګ غواړي په قصدي ډول پر افغان ځواکونو داسې جنایات تر سره کړي چې په کُلي ډول د افغانانو ترمنځ د جوړ جاړي هرډول احتمال له منځه یوسي او افغان ښکیل لوري یو او بل ته داسې وخشموي چې د جوړ جاړي په ځای تل له یو اوبل څخه د غچ اخیستنې په فکر کې وي.
نوموړی وایي؛
دا چې د یوه پیره دار او یاهم څو تنو وسله والو د شتون په پلمه له ۲۵۰ تر ۳۰۰ پوري خلګ مړه او ژوبل کیږي دا پرته له دې چې د جګړې د تشدید او تمدید لپاره یوه خطرناکه امریکايي دسیسه وبلل شي بله هیڅ توجیه نه لري
