(کابل ټکی کام، ۱۳۹۷، وری ۱۹) د امريکا متحده ايالاتو د نيويارک ښار د ټرمپ ټاور په ودانۍ کې د اور لګېدو پېښه کې يو تن وژل شوی او شپږ تنه نور ټپيان شوي دي.
په ټرمپ ټاور کې د امريکا د ولسمشر ټرمپ کور هم دی خو ويل کېږي نوموړی د اورلګېدو پر مهال په خپل کور کې نه و.
ځايي رسنۍ ليکي، دغه اورلګېدنه پرون ماښام ناوخته د ټرمپ ټاور په پنځوسم پوړ کې رامنځته شوې ده چې له کبله يې ياده مرګ ژوبله اړولې ده.
امنيتي مسئولينو سي ان ان تلويزيون ته ويلي ټپيان ټول د اور وژنې د ډلې غړي دي.
د امريکا ولسمشر ټرمپ په خپله رسمي ټويټر پاڼه ليکلي، چې اور وژل شوی او د اور وژنې ډلې هلې ځلې يې ستايلي دي.
تر اوسه پورې د اور لګېدو لامل نه دی په ډاګه شوی. خو بايد وويل شي چې د روان کال په جنورۍ مياشت کې هم په ټرمپ ټاور کې يوه اورلګېدنه رامنځته شوې وه خو چاته پکې مرګ ژوبله نه وه اوښتې.
