ټرمپ: په سوریه کې د کیمیاوي وسلو د کارولو غچ به ژر تر ژره واخلو

(کابل ټکی کام ۱۳۹۷ وری ۲۱)

امریکایي ولسمشر تیره شپه په سپینه ماڼۍ کې اعلان وکړ چې ، په سوریه کې د کیمیاوي وسلو د کارولو ځواب به ژر ژر تر ژره د سوریې حکومت وویني.
څو ورځې وړاندې د سوریې په دوما ښارګوټي کې د حکومت له خوا پر ولسي خلکو کیمیاوي وسلې وکارول شوې چې تر ۱۵۰ ډیر کسان پکې ووژل شول.

ټرمپ وویل؛ په سوري حکومت د پوځي برید پراخ امکانات لرو او ټول غوراوي مو په مخ کې پراته دي.
نوموړي زیاته کړه؛ لا یې هم څیړندویه ادارې پوښښ کوي ترڅو ومومي څوک د دې حملې مسؤل و.

که څه هم د سوریې حکومت د نړیوالو تر نظارت لاندې ټولې کیمیاوي وسلې په ۲۰۱۳ کال کې ختمې کړې خو بیا هم د دې وسلو د کارولو تور د بشارالاسد پر اداره او روسیه پورې کیږي، په داسې حال کې چې روسیه او سوریه د دې وسلو له کارولو انکار کوي.
بل پلو پر همدې موضوع د ملګرو ملتونو د امنیت په شورا کې د امریکا او روسیې استازو خپل منځي لفظي شخړه کړې.
امریکایي استازې نیکي هیلي روسي سیال ته ویلي؛ تاسو مو نه متحد یاست او نه درڅخه د اتحاد تمه لرو، خو په ځواب کې یې روسي استازي “واسلي نبینزیا“ویلي موږ تاسو د ملګرتیا په یوه تار هم نه پیژنو.
تازه راپورونه وایي؛ چې د سوریې په آسمان کې روسي او سوري الوتکو پروازونه ډیر کړي او د امریکا د ممکنه حملې لارې څاري .
پر همدې مهال د سوریې په ادلب ښار کې یوه چاودنه شوې چې ۱۵ تنه یې وژلي او ۳۶ نور ټپیان دي.