د امریکا ولسمشر ډونلډ ټرمپ د روسیې د هغه ګواښ په ځواب کې چې وايي د سوریې پر خاوره د امریکا توغول شوي توغندي به راوغورځوي له روسیې غوښتي چې د امریکا توغندیو ته دې ځان تیار کړي.
ټرمپ په یوه تازه ټویټ کې لیکلي دي: ”روسیې ویلي چې د سوریې پر خاوره هر توغول شوی توغندی به راوغورځوي. روسیې چمتو شه، ځکه دوی [توغندي] راروان دي، غوره، نوي او ’ځیرک!‘ تاسې باید له یوه په ګاز وژونکي حیوان سره چې خپل خلک وژني او له وژلو یې خوند اخلي شریکان نه شئ.“
د لبنان لپاره د روسیې سفیر، الکساندر زاسیپکین د سه شنبې په شپه، له المنار لوېزون سره په خبرو کې وویل، ”که امریکایان برید وکړي… میزایل به یې د روسیې له لوري راوغورځول شي او هغه سیمې به هم په نښه شي له کومو چې میزایل راتوغول شوي دي.“
امریکا وروسته له هغه د پوځي ځواب په اړه غور او خبرې کوي چې تېره اوونۍ، د سوریې د ختیځې غوطې په دوما ښار کې د یوه شکمن کېمیایي برید له امله نږدې ۷۰ ولسي وګړي ووژل شول. امریکا د سوریې حکومت د یاد کېمیايي برید مسؤل بولي، خو د سوریې ولسمشر بشارالاسد په برید کې د خپل حکومت لاس لرل رد کړي او وايي چې دا هر څه د دوی د وسله والو مخالفینو له لوري یوه جوړه شوې صحنه وه.
د امریکا ولسمشر ډونلډ ټرمپ د سوریې د وروستي کېمیايي برید او د خپل ځواب په اړه د فرانسې له ولسمشر ایمانویل ماکرون، د قطر له امیر تمیم بن حمد الثاني او د بریتانیې له لومړۍ وزیرې تیریزا مې سره هم خبرې کړې دي. تر دې دمه معلومه نه ده چې د امریکا په پوځي ځواب کې به یې نور متحدین هم برخه ورسره واخلي او که نه.
د بشارالاسد متحدې روسیې له امریکا غوښتي چې پوځي ګام پورته نه کړي. په ملګرو ملتونو کې د روسیې سفیر، واسیلي نبنزیا، د سې شنبې په ورځ وویل: ”یو ځل بیا له تاسو غواړم له هغو پلانونو ډډه وکړئ چې اوس یې تیاروئ“.
بل خوا، د روسیې فدراسیون د شورا د دفاعي کمېټې لومړي مرستیال، یوګني سربرنیکوف، نن چهارشنبه سپوټنیک اژانس ته ویلي، که د سوریې پر خاوره د امریکا په برید کې روسي پوځیان په نښه شي، روسیه به سمدستي ځواب ورکړي.
یو کال وړاندې هم د سوریې د ادلب په خان شیخون سیمه کې د همداسې یوه کېمیايي برید په ځواب کې د ډونلډ ټرمپ په امر د سوریې پر الشعیرات هوايي ډګر ۵۰ ټوماهاک توغندي وتوغول شول. د خان شیخون په کېمیايي برید کې ۸۰ کسان ووژل شول او تر ۳۰۰ زیات نور پکې ټپیان شول. د سوریې حکومت په یاد برید کې هم خپل لاس لرل رد کړي و.
