(کابل ټکی کام، ۱۳۹۷، غوایی ۱) د مشرانو جرګې د اقتصاد کمېسيون مشر محمد عظيم قویاش وايي، په تېرو څو کلونو کې د نړيوالې ټولنې ميلیونونه ډالره مرستې حيف و ميل شوي دي.
د قویاش په خبره، دغه پيسې د مرسته کوونکو ادارو او د امريکا متحده ايالاتو د بې غورې له کبله حیف وميل شوي چې بايد په اړه يې پلټنې وشي.
نوموړی وايي، د امريکا ميلياردونه ډالره مرستې پر ځای نه دي لګول شوي، سمه څارنه يې نه ده شوې او په هېواد کې د امریکا د بې غورۍ له کبله د فساد کچه لوړه شوې ده.
د قوياش په وينا، “که د حکومت او سيګار له لوري ګمارل شوي کمېسيونونه سمه څېړنه وکړي نو ډېر ژر به په فساد کې ښکېل کسان او ځای معلوم شي، بايد عدلي او قضايي ارګانونو ته وپېژندل شي او حيف و ميل شوې پيسې دې ترې د دولت خزانې لپاره واخيستل شي”.
د يادونې ده، چې وړمه ورځ د افغانستان لپاره د امريکا د مرستو امریکايي ادارې سيګار په خپل راپور کې ويلي و چې په افغانستان کې د امريکا مالي مرستو فساد زيات کړی دی.
دا په داسې حال کې ده، چې د روڼتيا نړيوال سازمان د ۲۰۱۸م کال په راپور کې افغانستان د نړۍ څلورم تر ټولو فاسد هېواد بلل شوی او له فساد څخه د پاکو ۱۸۰ هېوادونو په ليست کې يې ۱۷۷ م ځای خپل کړی دی.
