ولسمشر غني ټاکنو کمېسيون ته امر کړی چې له دې وروسته د ثبت شويو کسانو شمېر رسنيو سره شريک نه کړي
(کابل ټکی کام، ۱۳۹۷، غوایی ۱) د ولسي جرګې غړي اجرائيه رياست او يو شمير سياسي چارواکي نيوکه کوي چې په هېواد کې د انتخاباتو لپاره د نومليکنې بهير بې خونده روان دی او ډیری خلک له نومليکنې ډډه کوي.
که څه هم يوه اوونۍ تېرېږي چې په هېواد کې د ټاکنو لپاره د نومليکنې بهير پيل شوی خو د ټاکنو کمېسيون غړي وايي تر دې دمه په ټول هېواد کې يواځې ۱۸۹زره کسانو نومليکنه کړې چې دا شمېره د دوی له اټکله ډېره کمه ده.
طلوع نيوز ته د ټاکنو کمېسيون د ولايتي شورا رئيسانو ويلي، چې د ولسمشر غني په امر د ټاکنو کمېسيون د مشرانو له خوا ورته ويل شوي چې له دې وروسته د نومليکنې شمېره له رسنيو سره شريکه نه کړي.
تر اوسه د دې لامل نه دی په ډاګه شوی چې ولې د هغو کسانو شمېره له رسنيو پټه ساتل کېږي چې نومليکنه يې کړې وي.
د ولایتي شورا غړي وايي، د نومليکنې شمېره پټول له خلکو سره خيانت دی او بايد د ټاکنو کمېسيون له رسنيو سره يادې شمېرې شريکې کړي.
د چارو شنونکي دغې کار ته د شک په نظر ګوري وايي، که شمېرې پټې شي نو يوځل بيا به د تېرو ټاکنو په څېر درغلۍ وشي.
دا په داسې حال کې ده، چې نن اجرائيه مشر ډاکټر عبدالله وويل که د نومليکنې بهير همداسې ناکام روان وي نو ټاکنې به تر سوال لاندې راشي او ښايي د هېواد سياسي وضعيت له سترو ننګونو او ګواښ سره مخ شي.
په ورته وخت کې پر ټاکنو د څار بنسټونه هم دغه ستونزه تاييدوي وايي، چې له دوی د هغو کسانو شمېر پټ ساتل کېږي چې نومليکنه يې کړې وي.
نن د ولسي جرګې په غونډه کې د جرګې يو شمير استازو وويل: د پارلماني او ولایتي شوراګانو د ټاکنو لپاره نوم لېکنه رڼه نه ده او په دې اړه به دوی اضطراري غونډه جوړوي.
د ازادو ټاکنو د بنسټ اجرايه مشر یوسف رشيد وايي، څارونکو د ټاکنو په مرکزونو کې له انځور اخيستو منع کړي دي.
د يادونې ده، چې تېره ورځ د بلخ پخوانی والي او د جمعیت ګوند اجرائيه رئيس عطامحمد نور ويلي و، د دغې ولايت په درې اعشاريه پنځه ميليونه وګړو کې يواځې درې نيم زره کسانو نوم ليکنه کړې ده.
