جلال اباد ښار کې د نومليکنې په يوه مرکز کې چاودنه شوې
(کابل ټکی کام، ۱۳۹۷، غویی ۹) د جلال اباد ښار د څلورمې ناحيې اړوند د نومليکنې په يوه مرکز کې چاودنې مرګ ژوبله اړولې ده.
ځايي امنيتي سرچينې وايي، چاودنه د هغه مسجد تر څنګ شوې چې د رايې ورکونې لپاره د نومليکنې مرکز پکې پرانيستل شوی و.
عیني شاهدان وايي، چاودنه په موټرسيکل کې د ځای پرځای شويو چاودېدونکو توکو له کبله رامنځته شوې ده.
په لومړنيو معلوماتو کې ويل شوي چې د چاودنې له امله پنځه تنه ټپيان دي خو ځايي سرچينې وايي چاودنه ډېره زوروره وه ښايي ځينې کسان وژل شوي هم وي.
تر اوسه د دې چاودنې مسئوليت چا په غاړه نه دی اخيستی.
خو څو ورځې مخکې په کابل کې د نومليکنې يوه مرکز ته څېرمه چاودنه وشوه چې له امله يې لسګونه کسانو ته مرګ ژوبله واوښته او پړه يې د داعش ډلې منلې وه.
