(کابل ټکی کام ۱۳۹۷ غویی ۱۲)
د ګارډین برېتانوۍ ورځپاڼې په خپل یوه مطلب کې لیکلي، امریکایان د روان بنبست په دریو لارو کې بند پاتې دي: نه د طالب پر وړاندې، چې پراخ ولسي ملاتړ له ځانه سره لري، جګړه ګټلای شي، نه هم روان جنګ ته د پای ټکی ایښودلای شي او نه هم د جګړو له لومړیو کرښو تېښته ورته شونې ده.
د مقالې لیکوال سیمن ټسډال لیکي په کابل او کندهار کې پر ولسي وګړو وروستي بریدونه دا جوتوي چې دلته نور دې ځواکونو ته ناممکنو دریو لارو غوراوی پاتې، ځکه اوس داعش د لویو ویروونکو بریدونو په ترسره کولو سره هڅه کوي چې ځان له طالبانو سره سیال کړي .
لیکوال زیاتوي؛ د طالبانو تازه عملیاتو وضعیت لا پسې کړکیچن کړی په داسې حال کې چې دولت خپله اقرار کوي چې د هیواد له ۶۰ سلنې کمه برخه خاوره باندې واکمني لري.
د لیکوال په خبره، یو بل مشکل چې اوس راټوکیدلی دادی چې وسلوالې ډلې اوس په افغانستان کې د نوې راټوکیدلې دیموکراسي بیخ نړوي، هغوی د ټاکنو مخه نیسي او تر څنګ یې پر دولتي ځایونو بریدونه ترسره کوي چې دا بریدونه ورځ تر بلې د غني د ادارې ضعف زیاتوي.
طالبانو ته د غني له خوا د سولې وړاندیز او د طالبانو تازه عملیات ښکاره کوي چې دولت تر بل هر وخت په ټیټ پوړ کې قرار لري.
ورځپاڼه وایي؛دا ضعف یواځې افغان حکومت نه ګالي بلکې د ټرمپ پښې هم ورو په ورو سستوي، د ۲۰۱۷ په اګست میاشت کې د ټرمپ د جګړیزې ستراتیژی اعلان او په افغانستان باندې د بمونود مور غورځول ، همداراز د بمباریو زیاتوالي، نه یواځې دا چې وسلوال کمزوري نه کړل، بلکې لا یې تقویه کړل، چې ښیي دې ستراتیژي (Bombastic) یا دروغجن او بې تاثیره رنګ درلوده.
د ملګرو ملتونو د وروستي راپور تر مخه چې د فبروري په میاشت کې خپور شو څرګنده کړه چې په تیرکال کې لس زره ملکي افغانان د دې خپلسره حملو قربانیان و.
د مقالې د لیکوال سیمن تیسدال په باور، د امریکا د یوې هر اړخیزې ستراتیژۍ نشتون وضعیت دې ته رسولی چې افغانستان د امریکایي ځواکونو د وسلو د ازموینې په ډګر بدل شي.
داسې ښکاري چې ټرمپ یوځل بیا د (جګړه وکړه او بریالی شه) سیاست د ( واخله او تښته ) پر حالت بدل کړی او د سناتور پال وروستۍ څرګندونې چې واشنګټن پوسټ ته یې کړې د امریکایانو د بشپړ وتلو د تګلارې د عملي کولو ویلي، ۱۸۰ درجې تغیر څرګندوي.
خو لیکوال زیاتوي چې د ټرمپ داڅرګندونې به جګړه هیڅ ختمه ځکه نه کړي ځکهچې امریکا هلته د اوږدمهال لپاره ځان ښکیل کړی په داسې حال کې چې د امریکا د عامو خلکو هم اوس دا یقین راغلی چې امریکا نه شي کولی د طالبانو پر وړاندې جګړه د ‘بریا‘ په نوم ختمه کړي.
د ایلینویز پوهنتون مشهور څیړونکی کلاس ګروسمن وایي؛ امریکا د بریا په خاطر نه، د دفاع به خاطر جګړه کوي او اوس د جورج ډبلیو بوش د هغه ارمان د پلې کولو هڅه نه کوي چې د د یموکراتیکې افغان ټولنې د رامنځته کولو هڅې یې کړې
