هغه عراقی چې بوش یې په بوټونو وویشت اوس د عراق پارلماني ټاکنو ته کاندید دی

هغه عراقی خبریال چې په ۲۰۰۸ز کال کې یې د امریکا ولسمشر جورج بوش په بوټونو ویشتلی و، اوس یې ځان د عراق پارلماني ټاکنو ته کاندید کړی دی.

منتظر الزیدي له هغه وروسته په نړیواله کچه مشهور شو کله چې یې د ۲۰۰۸ز کال د دسمبر په ۱۴مه، د یوه خبري کنفرانس پر مهال امریکايي ولسمشر جورج ډبلیو بوش، چې پر عراق د امریکا له یرغل ۵ کاله وروسته عراق ته تللی و، په بوټونو وویشت. په عربي هېوادونو کې یو کس په بوټ ویشتل د هغه د سپکاوي وروستی حد بلل کېږي.

الزیدي د بوټ ویشتلو پر مهال په لوړ غږ په عربي ژبه وویل، ”دا د عراق د خلکو له خوا د خدای پامانۍ مچو ده، سپیه! [د بوټ دا ګوزار] د یتیمانو او هغو کسانو له خوا دی چې په عراق کې وژل شوي دي.“

نوموړی د بوش پر لور د بوټونو له ګوزار وروسته ونیول شو، او بیا په ۳ کاله بند محکوم شو. خو له ۹ میاشتې بند وروسته ازاد شو، او له هېواده بهر تللو ته مجبور کړل شو.

الزیدي ویلي که پارلمان ته بریالی شو، له هغو سیاستمدارانو سره به حساب وکړي چې د بوش ملاتړ یې کړی، ”دوی باید داسې له عراقه وایستل شي لکه څنګه چې مو د امریکا اشغالګر پوځونه وایستل. جورج بوش هم تللی دی – دوی ټول باید عراق پرېږدي، دا کسان د تل لپاره په عراق کې نشي پاتې کېدای.“

منتظر الزیدي په پارلمان کې د کرسۍ ترلاسه کولو د کمپاین پر مهال خبریالانو ته ویلي، دئ له امریکا غواړي چې د عراق د جګړې له امله بخښنه غواړي او په یرغل کې زیانمنو شویو عراقیانو ته تاوان ورکړي.

منتظر الزیدي نه غواړي چې د بوټونو د ګوزار له پېښې په ټاکنو کې د خپلې بریا لپاره ګټه واخلي، د هغه په وینا، ”دې کړنې د یوه مظلوم اکثریت د احساساتو ښکارندويي کوله.“

نوموړي له آر ټي ټلوېزون سره په خبرو کې ویلي، ”ما په زغرده د دې کار مخالفت کړی چې په کمپاین کې دې پر بوش د بوټونو د ګوزار انځورونه وګرځول شي. هیڅکله به یې ونه منم.“

منتظر الزیدي زیاته کړې، ”تاریخ دا ثبت کړل چې کله امریکا پر عراق یرغل وکړ، ځینې عراقیان د دوی په خوا کې ودرېدل، خو د عراق خلکو [یرغلګر] په بوټونو وویشتل. داسې به نه ویل کېږي چې منتظر پر امریکایانو د بوټونو ګوزار وکړ؛ د منتظر نوم او توری به د دې هېواد په نوم کې مدغم شي. داسې به ویل کېږي چې عراقیانو اشغال ونه مانه، مخالفت او مقاومت یې ورسره وکړ، او یرغلګر یې په بوټونو وویشتل.“