په ټاکنیزو کمیسیونونو کې اختلافات: حکومت په ټاکنو کې پراخو درغلیو ته زمینه برابروي
(کابل ټکی کام ۱۳۹۷ غویی ۲۴)
د ټاکنو کمیسیون یو شمیرو غړو د جمهور رئیس اشرف غني د هغه فرمان په غبرګون کې چې ګواکې د تذکرې پر فټوکاپي به سټیکر لګول کیږي، اعتراض کړی او هغه یې پراخو درغلیو ته زمینه سازي بللې.
په دې لړ کې د ټاکنو کميسيون د دارلانشاه مشرې شهلا حق نن له خپلې دندې استعفا وکړه او خپلې استعفا لامل یې تذکرو پر فتو کاپي د سټیکر لګول وبلل.
نوموړې ویلي چې د ارګ وروستۍ پريکړه په راتلونکو ټاکنو کې شرموونکو درغليو ته لاره هواره وي.
بل پلو د ټاکنو کمیسیون څلورو لوړپوړو غړیو وسیمه بادغيسي، معاذ الله دولتي،عبدالقادر قريشي او مليحه حسن په یوه پریکړه لیک کې چې رسنیو ته یې استولی د ولسمشر وروستی فرمان رد کړی او ویلي یې دي چې دا فرمان د ټاکنو کمیسیون مشر عبدالغفور صیاد په خپلسري توګه له ولسمشر سره منلی په داسې حال کې چې د دوی نظر په کې هیڅ نه دی پوښتل شوی .
دوی ویلي چې هیڅ څوک نه شي کولی د نوم لیکنې په دوران کې د کمیسیون په اصولو او مقرراتو کې بدلون راولي.
خو د نوم لیکنو د مراکزو مشر اول الرحمن رودوال بیا وایي چې موږ ټولو مراکزو ته لارښوونه کړې چې کله هم پرکاپۍ سټیکر لګول کیږي، باید د نوم لیکنې پرمهال هغه شخص نه یواځې کاپي بلکه اصلي تذکره هم له ځانه سره ولري.
د ولسي جرګې غړی فرهاد سخي وایي، د تذکرې پر کاپۍ د سټیکر لګولو موضوع به انتخابات پر انتصاباتو بدل کړي چې د ده په خبره له وړاندې به سلګونه زره تقلبي کاپیانې د اشخاصو په ګټه کارول شوې وي.
نوموړی وایي؛ داسې ټاکنو ته چې له ښکاره درغلیو ډکې وي هیڅ اړتیا نشته.
په همدې حال کې د افغانستان د رڼو ټاکنو بنسټ یا ټیفا هم وایي، چې حکومت په لوی لاس د ټاکنو بهیر کې لاسوهنې ته لارې برابروي.
یاد بنسټ وایي؛ د ټاکنو کمیسیون د جعلي او اصلي تذکرو د فیلټر کولو ظرفیت نه لري نو په همدې اساس شونې چې په لویه کچه درغلي وشي.
