(کابل ټکی کام ۱۳۹۷ غویی ۲۴)
د ملي یووالي د حکومت مشر اشرف غني نن د امام ابوحنیفه رحمةالله د شخصیت په اړه په یوه رابلل شوي سیمینار کې ګډونوالو ته د امام صاحب د ژوند او د هغه د مناقبو په هکله خبرې وکړې.
هغه وویل؛ روانې شخړې او جنګونه د امام اوبوحنیفه د فکر خلاف دي ځکه چې د ده په آند نوموړي امام افراطیت نه خوښاوو.
هغه وویل؛ په ۱۹ پیړۍ کې یو شمیر ځوانان مو د لویدیځ کلتور او فرهنګ دومره وځپل چې اصلاً خپل معتقدات یې هیر کړل، خو ځینې نور بیا د غرب پرضد دومره افراطیت ته وهڅول شول چې د خپلو پرضد هم را وپاریدل .
نوموړي زیاته کړه چې اوس هغه وخت تیر ده خپلو دیني معتقداتو ته به لکه څنګه چې لازمه ده ژمن اوسو او د جعفر صادق او امام ابوحنیفه لار به تعقیبوو.
اشرف غني وویل؛ امام صاحب په سختو شرایطو کې خپلو منتقدینو ته ښه ځوابونه ورکړي او د هغوی پر وړاندې یې ښه مقاومت کړی و.
نوموړي ټینګار وکړ؛ ځوانان مو باید د فکرونو په دوه لارۍ کې پرې نږدو، دیموکراتیک او مذهبي اصول به ګډ پالو او تر څنګ به یې په انتخاباتو کې چې د ده په خبره د اسلام یوه برخه ده ګډون کوو.
غني زیاته کړه؛“ موږ هره ورځ په دغه خاوره کې شهیدان ورکوو، دا ځکه چې هغه کسان چې په دغه فتنه اخته دي، د امام اعظم رح له فکر څخه خبر نه دي. ځکه هغه څه چې دوی یې کوي د امام اعظم په مکتب کې ځای نه لري. انفجارونه د امام اعظم طریقه نه ده.“
