نعمان لطیف
ماښام ته نږدې بازارونو کې شور او شر جوړ وي، هر چا لس اته خلتې ورسره اخیستې او په منډه ؤي او دخلکو له گڼې گوڼې په یو څنگ داسې په تراټ وځي لکه مار چې ورپسې وي.
له یؤه سره هم دا فکر نه نشته چې سودا باید دمازیگر تر لمانځه هم وړاندې وکړي، ماښام ته نږدې آرام مغز دعا ته کښېني او دوران وطن دهوساینې او جوړېدنې دعاؤې له خدایه وغواړي.
روژه موږ ته په هؤس دکابو درس راکؤي او راته ښیي چې یؤه شېبه نفسي هؤس او غوښتنې کابو کړو او بیا هغه ناچاره خلک په زړه کړو چې ددؤامداره او سختې ناچارۍ له امله له تمامو نعمتونو محروم دي. نفسي هؤسونه یې بالکل ختم او غوښتنې یې په ستونې کې وچې شوي دي.
که موږ د روژه ماتي مصارف محدود کړو او دهغو اضافي مصارفو چې روژه ماتي ته یې کوو، نیمایي دچم او گاؤنډ هغو ناچاره روژه دارو ته ورکړو چې د اوبو او پیاز سره روژه ماتؤي، په باؤر سره ویلی شم چې دروژې اصلي مقصد به مو درک کړی او ترلاسه کړی وي.
روژه کې شیطانان تړلای کیږي او فقط د نفس سره مقابله راپاته وي ؛ درځئ نفس هم مُهار کړو او له همدا نن ورځې عهد وکړو چې دخوراکي توکو له هغو پرېمانه خلتو چې ماښام نږدې مو کورونو ته روانې کړې وي، یؤه یؤه خلته هغو بېؤزله روژه دارو ته ورکړو چې دروژه ماتي لپاره هیڅ نه لري او دیوې گوله ډوډۍ پیدا کولو لپاره په گرمه روژه کې تمامه ورځ دښار کوڅو کې پړي په اوږو گرځوي.
هغه ته به هم یوه خور په انتظار ناسته وي، یوه مور به یې لارې څاري، یو یتیم به یې دپښو کښالو ته غؤږ وي چې گوندې کاکا به یو څه ورته ور وړي، او یو سپین ږیری بابا به په دې هیله دټکڼه گرمۍ روژې نیسي چې گواکې ځوی به یې دروژه ماتي لپاره یوه گوله ډوډۍ ورته پیدا کړي.
که دا لالهانده مزدور ماښام کور ته بېنوا وگرځي، څومره هیلي به ناهیلي شي او دڅومره وگړو به څېرو به مایوسي خپره شي؟
یوه شېبه همداسې حالت په ځان درولئ او داسې وگڼئ چې هیڅ درسره نشته دی او دټول تؤان او کوښښ باوجود هیڅ په لاس درنغلل؛ ماښام چې له اوبو سره روژه ماتوئ څه فکر کوئ چاته به مو دعا زړه وغواړي؟
هیله ده دروژې بابرکته میاشت له خپلو هؤسونو ځار نه کړو، دبېوزله کورنیو په وچو او سپېرو شونډو موسکاؤې خپرې کړو او د خیر او برکت په دې میاشت کې چې یو طلایي فرصت یې هم گڼلی شو په نیکیو کې یو تر بله سیالي وکړو
عُباده بن صامت رضي الله عنه له نبي علیه السلام والتسلیم څخه روایت کوي: روژه دبرکت مياشت ده په دې مياشت کې اللهﷻ گناهونه بخښي. الله تعالی ستاسو دخير سياليو ته گوري او دملايکو مخکې په تاسو باندې فخر کوي؛ نو الله تعالی ته ښه کارونه وړاندې کړئ. ځکه چې هغه څوک بدبخته دی چې په دې مياشت کې د الله تعالی له رحمت (پېرزوينو) څخه بې برخې پاته شي.
(الطبراني)
